مکحول بیان کرتے ہیں: ایک مرتبہ میں سیدنا عبداللہ بن عمر رضی اللہ عنہما کے ساتھ وہ پیدل چلتے ہوئے جا رہے تھے، اسی دوران ایک سیاہ فام ان کے پاس سے گزرا، جس کے پاس نیزہ تھا، اس نے اس کا نیچے والا دھاری دار حصہ سیدنا عبداللہ بن عمر رضی اللہ عنہما کے آگے ان کے پاؤں کے انگوٹھے اور ساتھ والی انگلی کے درمیان رکھا (اور انہیں زخمی کر دیا) انہیں اُٹھا کر گھر لایا گیا، ان کی پنڈلی ورم آلود ہو گئی، حجاج ان کی عیادت کرنے کے لئے ان کے پاس آیا اور بولا: اے ابوعبدالرحمن! آپ کو یہ تکلیف کس نے پہنچائی ہے؟ میں اس سے آپ کا بدلہ لیتا ہوں، تو سیدنا عبداللہ بن عمر رضی اللہ عنہما نے فرمایا: اللہ تعالیٰ اس سے بدلہ لے گا، اللہ تعالیٰ اس سے بدلہ لے گا، پھر انہوں نے فرمایا: اللہ تعالیٰ کے حرم اور اس کی مقرر کردہ امان والی جگہ کا کیا معاملہ ہے؟ کہ وہاں ہتھیار اُٹھائے جاتے ہیں۔ (علامہ ہیثمی فرماتے ہیں:) میں یہ کہتا ہوں: ”صحیح“ میں اس کا کچھ حصہ مذکور ہے۔
یہ روایت امام طبرانی نے دو اسناد کے ساتھ نقل کی ہے اور اس کے رجال ثقہ ہیں۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 15870]

یحیی بن بکیر بیان کرتے ہیں: سیدنا عبداللہ بن عمر رضی اللہ عنہما کا انتقال حج کے بعد مکہ میں ہوا تھا، ان کی کنیت ابوعبدالرحمن تھی، ان کے محصب کے مقام پر دفن کیا گیا، بعض لوگوں کا یہ کہنا ہے: ”فخ“ کے مقام پر دفن کیا گیا، جس وقت نبی اکرم صلی اللہ علیہ وسلم نے انہیں غزوہ خندق میں شرکت کی اجازت دی تھی، اس وقت ان کی عمر پندرہ سال تھی، اور غزوہ خندق شوال کے مہینے میں چار ہجری میں ہوا تھا، تو انتقال کے وقت ان کی عمر 84 برس ہو گی۔
یہ روایت امام طبرانی نے نقل کی ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 15871]

امام مالک بن انس بیان کرتے ہیں: سیدنا عبداللہ بن عمر رضی اللہ عنہما کا انتقال 84 برس کی عمر میں ہوا تھا۔
یہ روایت امام طبرانی نے نقل کی ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 15872]

واقدی بیان کرتے ہیں: سیدنا عبداللہ بن عمر رضی اللہ عنہما کا انتقال 74 ہجری میں ہوا تھا انہیں ”فخ“ کے مقام پر دفن کیا گیا اس وقت ان کی عمر 84 برس تھی۔
یہ روایت امام طبرانی نے نقل کی ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 15873]