سیدنا عمار بن یاسر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”حلال بالکل واضح ہے اور حرام بھی بالکل واضح ہے، اور ان دونوں کے درمیان کچھ مشتبہ چیزیں ہیں؛ جس نے مشتبہات سے پرہیز کیا وہ اپنے دین کی حفاظت کے اعتبار سے زیادہ متقی ہوا، اور جو ان میں پڑ گیا وہ عنقریب کبیرہ گناہوں میں جا پڑے گا؛ جیسے چرواہا ممنوعہ چراگاہ کے کنارے چراتا ہے تو قریب ہے کہ اس میں جا پڑے۔ آگاہ رہو! ہر بادشاہ کی ایک مخصوص چراگاہ ہوتی ہے، اور اللہ تعالیٰ کی مخصوص چراگاہ اس کی حدود یعنی ممنوعہ امور ہیں۔“ وضاحت: یہ سند ضعیف ہے، البتہ صحیح بخاری و مسلم میں سیدنا نعمان بن بشیر رضی اللہ عنہ کی حدیث اس کا شاہد ہے۔ ابو یعلیٰ نے بھی اسے اسی کے مانند روایت کیا ہے۔ [المطالب العالية بزوائد المسانيد الثمانية/كِتَابُ الْبُيُوعِ/حدیث: 1420]

سیدنا سعد بن ابی وقاص رضی اللہ عنہ کے آزاد کردہ غلام ابو عبد الرحمن سے روایت ہے، وہ بیان کرتے ہیں کہ: میں اور سیدنا سعد رضی اللہ عنہ رات کے وقت کھجوروں کے ایک باغ میں گئے، ہم نے باغ کے مالک کو تلاش کیا لیکن وہ ہمیں نہ ملا، تو سیدنا سعد رضی اللہ عنہ نے مجھ سے فرمایا: ”اگر تمہیں یہ بات پسند ہے کہ تم پکے اور سچے مسلمان بنو، تو اس (باغ) میں سے کچھ بھی نہ کھانا“، راوی کہتے ہیں: چنانچہ ہم نے بھوکے رہ کر رات گزاری۔ [المطالب العالية بزوائد المسانيد الثمانية/كِتَابُ الْبُيُوعِ/حدیث: 1421]