سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا، اور میں اس وقت آپ صلی اللہ علیہ وسلم کی دائیں یا بائیں ران کے پاس (بالکل قریب) تھا: «لَبَّيْكَ بِعُمْرَةٍ وَحَجٍّ» ”میں عمرہ اور حج (کی نیت کے ساتھ) حاضر ہوں“۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3805]

سیدنا انس رضی اللہ عنہ سے روایت ہے کہ ”ہم نے رسول اللہ صلی اللہ علیہ وسلم کے ہمراہ سفر کیا تو نہ تو کسی روزہ دار نے روزہ نہ رکھنے والے پر کوئی اعتراض کیا اور نہ ہی روزہ چھوڑنے والے نے روزہ رکھنے والے پر کوئی عیب لگایا، نیز ایک مرتبہ رمضان المبارک کے دوران سفر میں لوگ سخت مشقت اور پیاس کی شدت سے نڈھال ہو گئے تو رسول اللہ صلی اللہ علیہ وسلم نے پانی کا ایک برتن طلب فرمایا اور اسے نوش کیا تاکہ لوگ آپ صلی اللہ علیہ وسلم کو دیکھ کر اطمینان کر لیں کہ آپ صلی اللہ علیہ وسلم روزہ افطار فرما چکے ہیں۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3806]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم رمضان المبارک کے ایام میں ایک سفر پر تھے اور آپ صلی اللہ علیہ وسلم حالتِ روزہ میں تھے، پھر آپ صلی اللہ علیہ وسلم کی خدمت میں پانی کا ایک برتن لایا گیا جسے آپ صلی اللہ علیہ وسلم نے اپنے دستِ مبارک پر رکھ کر نوش فرمایا جبکہ لوگ آپ صلی اللہ علیہ وسلم کو دیکھ رہے تھے، چنانچہ (آپ صلی اللہ علیہ وسلم کے عمل کو دیکھ کر) لوگوں نے بھی پانی پی لیا۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3807]

سیدنا انس رضی اللہ عنہ سے روایت ہے کہ نبی اکرم صلی اللہ علیہ وسلم بدر کے اس کنویں کے پاس تشریف لائے جس میں ابو جہل اور اس کے ساتھیوں (کی لاشیں) تھیں، ان کے قتل کے تین دن بعد آپ صلی اللہ علیہ وسلم نے رات کے وقت کھڑے ہو کر پکارا: «يَا أَبَا جَهْلِ بْنَ هِشَامٍ، يَا عُتْبَةُ بْنَ رَبِيعَةَ، يَا شَيْبَةُ بْنَ رَبِيعَةَ، يَا أُمَيَّةُ بْنَ خَلَفٍ، هَلْ وَجَدْتُمْ مَا وَعَدَكُمْ رَبُّكُمْ حَقًّا؟ فَإِنِّي قَدْ وَجَدْتُ مَا وَعَدَنِي رَبِّي حَقًّا» ”اے ابو جہل بن ہشام! اے عتبہ بن ربیعہ! اے شیبہ بن ربیعہ! اے امیہ بن خلف! کیا تم نے اپنے رب کے وعدے کو سچا پایا؟ میں نے تو اس وعدے کو عین برحق پایا ہے جو میرے رب نے مجھ سے فرمایا تھا“، اس پر صحابہ کرام رضی اللہ عنہم میں سے جو وہاں موجود تھے وہ آپ صلی اللہ علیہ وسلم کے پاس آئے اور عرض گزار ہوئے: ”اے اللہ کے رسول صلی اللہ علیہ وسلم ! کیا آپ ایسے لوگوں کو پکار رہے ہیں جو تین دن سے مردہ ہو کر بدبودار ہو چکے ہیں؟“ تو آپ صلی اللہ علیہ وسلم نے ارشاد فرمایا: «مَا أَنْتُمْ بِأَسْمَعَ لِمَا أَقُولُ مِنْهُمْ، إِلَّا أَنَّهُمْ لَا يَسْتَطِيعُونَ أَنْ يُجِيبُونِي» ”تم میری بات کو ان سے زیادہ بہتر طور پر نہیں سن رہے، بس اتنی بات ہے کہ وہ مجھے جواب دینے کی استطاعت نہیں رکھتے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3808]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم (بدر کے) کنویں کی منڈیر پر تشریف لائے (اور مشرکین کی لاشوں کو دیکھا)“، پھر راوی نے سابقہ حدیث کی مانند (پورا واقعہ) ذکر کیا۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3809]

سیدنا انس رضی اللہ عنہ سے روایت ہے کہ ایک شخص قربانی کا اونٹ ہانک کر لے جا رہا تھا کہ رسول اللہ صلی اللہ علیہ وسلم نے اس سے فرمایا: ” «ارْكَبْهَا» (اس پر سوار ہو جاؤ)“، اس نے عرض کی: اے اللہ کے رسول! یہ تو قربانی کا جانور (بَدَنہ) ہے، آپ صلی اللہ علیہ وسلم نے دوبارہ فرمایا: ” «ارْكَبْهَا وَإِنْ كَانَتْ بَدَنَةً» (اس پر سوار ہو جاؤ خواہ یہ قربانی کا اونٹ ہی کیوں نہ ہو)“۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3810]

سیدنا انس رضی اللہ عنہ سے روایت ہے کہ نبی صلی اللہ علیہ وسلم بقیع الغرقد کے پاس سے گزرے تو اچانک ایک شخص نے اپنے ساتھی کو پکارا: ”اے ابوالقاسم!“، نبی صلی اللہ علیہ وسلم (یہ سن کر) اس کی جانب متوجہ ہوئے تو اس شخص نے عرض کیا: ”اے اللہ کے رسول صلی اللہ علیہ وسلم ! میرا مقصود آپ کو مخاطب کرنا نہیں تھا بلکہ میں نے تو فلاں شخص کو پکارا تھا“، جس پر آپ صلی اللہ علیہ وسلم نے ارشاد فرمایا: ”تم میرے نام پر نام تو رکھو لیکن میری کنیت اختیار نہ کرو۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3811]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”مومن کا خواب نبوت کے چھیالیس حصوں میں سے ایک حصہ ہے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3812]

سیدنا انس رضی اللہ عنہ سے روایت ہے کہ ”ایک شخص نے (دیوار کے) کسی سوراخ یا شگاف سے نبی کریم صلی اللہ علیہ وسلم کے ہاں جھانکا، تو آپ صلی اللہ علیہ وسلم نے ایک چوڑے پھل والے تیر کے ذریعے اس کی طرف نشانہ لیا۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3813]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جب تم میں سے کوئی نماز کے لیے آئے تو اسے چاہیے کہ وہ پورے وقار اور سکون کے ساتھ چلے، پھر نماز کا جو حصہ وہ (جماعت کے ساتھ) پا لے اسے ادا کرے اور جو اس سے رہ گیا ہو اسے (بعد میں) پورا کرے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3814]