سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جو شخص کوئی نماز بھول جائے تو اسے چاہیے کہ جب وہ اسے یاد آئے تو اسے ادا کر لے، اس کا اس کے علاوہ کوئی دوسرا کفارہ نہیں ہے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 2856]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”ابنِ آدم بوڑھا ہو جاتا ہے مگر اس کی دو خصلتیں ہمہ وقت جوان رہتی ہیں: ایک مال کی حرص اور دوسری طویل زندگی کی لالچ۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 2857]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم فرمایا کرتے تھے: ”اگر ابنِ آدم کے پاس مال و دولت سے بھری دو وادیاں ہوں تو وہ ان کے ساتھ تیسری وادی کا بھی طلب گار ہوگا، اور ابنِ آدم کے پیٹ کو مٹی کے سوا کوئی چیز نہیں بھر سکتی، اور جو اللہ کے حضور توبہ کرے اللہ تعالیٰ اس کی توبہ قبول فرما لیتا ہے“۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 2858]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم نے اپنی قربانی کا جانور اپنے دستِ مبارک سے ذبح فرمایا اور اس پر اللہ کی بڑائی بیان کرتے ہوئے تکبیر کہی۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 2859]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”یقیناً اللہ تعالیٰ اپنے بندے کی توبہ پر تم میں سے اس شخص کی نسبت کہیں زیادہ خوش ہوتا ہے جو (نیند سے) بیدار ہو اور اچانک اپنے اس اونٹ کو اپنے پاس موجود پائے جسے اس نے کسی چٹیل بیابان میں گم کر دیا تھا۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 2860]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم کے عہدِ مبارک میں قیمتیں بڑھ گئیں تو لوگوں نے عرض کیا کہ اے اللہ کے رسول! ہمارے لیے نرخ مقرر فرما دیجیے، اس پر آپ صلی اللہ علیہ وسلم نے ارشاد فرمایا: ”یقیناً اللہ ہی «الْقَابِضُ، الْبَاسِطُ، الْمُسَعِّرُ الرَّازِقُ» ”تنگی کرنے والا، کشادگی دینے والا، قیمتیں مقرر کرنے والا اور رزق عطا فرمانے والا ہے، اور میں یہ امید رکھتا ہوں کہ میں اللہ تعالیٰ سے اس حال میں ملوں کہ تم میں سے کوئی بھی مجھ سے اپنی جان یا مال کے متعلق کسی زیادتی کا مطالبہ کرنے والا نہ ہو“۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 2861]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم (راستے میں گری ہوئی) کسی کھجور کے پاس سے گزرتے تو آپ صلی اللہ علیہ وسلم کو اسے اٹھا لینے سے کوئی چیز مانع نہ ہوتی تھی سوائے اس اندیشے کے کہ کہیں وہ صدقہ نہ ہو۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 2862]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ہمیں جب بھی کوئی خطبہ ارشاد فرمایا تو اس میں یہ لازماً بیان فرمایا: ”اس شخص کا کوئی ایمان نہیں جس میں امانت داری نہیں، اور اس شخص کا کوئی دین نہیں جس میں عہد و پیمان کی پاسداری نہیں۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 2863]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم (ارکان و واجبات کی) تکمیل کے ساتھ لوگوں میں سب سے زیادہ مختصر نماز ادا فرمانے والے تھے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 2864]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بندہ اس وقت تک مسلسل خیر و عافیت میں رہتا ہے جب تک کہ وہ جلد بازی سے کام نہیں لیتا۔“ صحابہ کرام رضی اللہ عنہم نے دریافت کیا کہ اے اللہ کے رسول! وہ جلد بازی کس طرح کرتا ہے؟ تو آپ صلی اللہ علیہ وسلم نے ارشاد فرمایا: ”وہ یہ کہنے لگتا ہے کہ میں نے دعا تو مانگی تھی لیکن مجھے میری دعا قبول ہوتی نظر نہیں آ رہی۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 2865]