سیدنا ابوہریرہ رضی اللہ عنہ سے روایت ہے کہ میں نے اس حجرہ مبارک کے مکین، سچے اور اللہ کی جانب سے سچے قرار دیے گئے رسول اللہ صلی اللہ علیہ وسلم کو یہ فرماتے ہوئے سنا کہ: «لَا تُنْزَعُ الرَّحْمَةُ إِلَّا مِنْ شَقِيٍّ» ”رحمت و شفقت کا جذبہ صرف بدبخت اور سنگدل انسان ہی کے دل سے نکالا جاتا ہے۔“ [مسند أبي يعلى الموصلي/مُسْنَدِ أَبِي هُرَيْرَةَ رَضِيَ اللَّهُ عَنْهُ/حدیث: 6141]

سیدنا ابوہریرہ رضی اللہ عنہ سے روایت ہے کہ مکہ مکرمہ کے راستے میں لوگوں کو ایک تندوتیز ہوا نے آ لیا، اس وقت سیدنا عمر رضی اللہ عنہ حج کے سفر میں تھے، جب ہوا کی شدت بہت زیادہ بڑھ گئی تو انہوں نے اپنے پاس موجود لوگوں سے دریافت فرمایا: ”یہ ہوا کیا ہے؟“ مگر کسی نے انہیں کوئی جواب نہ دیا، سیدنا ابوہریرہ رضی اللہ عنہ بیان کرتے ہیں کہ جب مجھے یہ اطلاع ملی کہ سیدنا عمر رضی اللہ عنہ نے اس بارے میں دریافت فرمایا ہے تو میں نے اپنی سواری کو تیز دوڑایا یہاں تک کہ میں ان تک پہنچ گیا اور عرض کی: اے امیر المؤمنین! ہمیں معلوم ہوا ہے کہ آپ نے ہوا کے بارے میں دریافت فرمایا ہے، جبکہ میں نے رسول اللہ صلی اللہ علیہ وسلم کو یہ فرماتے ہوئے سنا ہے: ”ہوا اللہ تعالیٰ کی رحمت و راحت میں سے ہے، یہ کبھی رحمت لے کر آتی ہے اور کبھی عذاب، لہٰذا تم اسے برا بھلا نہ کہو، بلکہ اللہ تعالیٰ سے اس کی خیر و بھلائی کا سوال کرو اور اس کے شر سے اللہ کی پناہ مانگو۔“ [مسند أبي يعلى الموصلي/مُسْنَدِ أَبِي هُرَيْرَةَ رَضِيَ اللَّهُ عَنْهُ/حدیث: 6142]