سیدنا ابوہریرہ رضی اللہ عنہ سے روایت ہے کہ ہم خیبر کے دن رسول اللہ صلی اللہ علیہ وسلم کے ساتھ تھے، تو آپ صلی اللہ علیہ وسلم نے اپنے ساتھ موجود ایک آدمی کے بارے میں فرمایا: ”یہ اہلِ جہنم میں سے ہے۔“ پھر جب جنگ شروع ہوئی تو اس نے نہایت شدید لڑائی لڑی، یہاں تک کہ زخموں نے اسے نڈھال کر دیا۔ لوگ نبی کریم صلی اللہ علیہ وسلم کے پاس آئے اور عرض کیا: ”اے اللہ کے رسول! جس شخص کے بارے میں آپ نے فرمایا تھا کہ وہ اہلِ جہنم میں سے ہے، اس نے تو بڑی سخت لڑائی لڑی ہے۔“ آپ صلی اللہ علیہ وسلم نے فرمایا: ”خبردار! اس حالت کے باوجود وہ اہلِ جہنم میں سے ہی ہے۔“ پھر جب زخموں کی تکلیف نے اسے بے چین کر دیا تو اس نے ترکش میں ہاتھ ڈالا، اس میں سے ایک تیر نکالا اور اس کے ذریعے خود کو ہلاک کر لیا۔ لوگ رسول اللہ صلی اللہ علیہ وسلم کے پاس آئے اور عرض کیا: ”اے اللہ کے رسول! اللہ نے آپ کی بات سچ کر دکھائی، جس شخص کے متعلق آپ نے ہمیں بتایا تھا کہ وہ اہلِ جہنم میں سے ہے، اس نے اپنے ترکش سے تیر نکالا اور اس سے اپنی جان لے لی۔“ تو آپ صلی اللہ علیہ وسلم نے سیدنا بلال رضی اللہ عنہ کو حکم دیا کہ لوگوں میں اعلان کر دیں: ”خبردار! جنت میں صرف مومن ہی داخل ہو گا، اور بے شک اللہ تعالیٰ اس دین کی تائید فاجر آدمی کے ذریعے بھی فرما دیتا ہے۔“
امام طبرانی رحمہ اللہ فرماتے ہیں: ”غالب نے سعید سے اور انہوں نے ابوہریرہ رضی اللہ عنہ سے اس حدیث کے سوا کوئی اور حدیث مسنداً روایت نہیں کی، اس میں ابوبکر منفرد ہیں۔“ [المعجم الأوسط/بَابُ الْجِيمِ/حدیث: 3393]