سیدنا جابر بن عبداللہ رضی اللہ عنہما کہتے ہیں کہ جب غزوہ احد ہوا تو رسول اللہ صلی اللہ علیہ وسلم نے مقتولین (شہدائے) احد کی طرف دیکھا اور فرمایا: ”انہیں ان کے خون سمیت لپیٹ دو، بیشک میں ان کا گواہ ہوں۔“ اور ایک ہی قبر میں ایک، دو، تین تین آدمیوں کو دفن کیا گیا اور آپ صلی اللہ علیہ وسلم پوچھتے کہ ”ان میں سے زیادہ قرآن پڑھنے والا کون ہے؟“ پھر اسے مقدم کیا جاتا۔ سیدنا جابر رضی اللہ عنہما کہتے ہیں کہ اس دن میرے باپ اور چچا کو ایک ہی قبر میں دفن کیا گیا۔ [السنن الكبرى للبيهقي/كتاب الجنائز/حدیث: 6801]

حضرت ابوہریرہ رضی اللہ عنہ سے روایت ہے کہ بیشک رسول کریم صلی اللہ علیہ وسلم نے فرمایا: ”مجھے اس ذات کی قسم جس کے ہاتھ میں میری جان ہے کہ نہیں کسی کو اللہ کی راہ میں زخم آتا اور اللہ جانتا ہے جسے بھی اس کی راہ میں زخم آیا مگر وہ قیامت کے دن آئے گا اور اس کا زخم خون بہا رہا ہو گا، اس کا خون خون ہی کے رنگ میں ہو گا مگر اس کی خوشبو کستوری کی ہو گی۔“ [السنن الكبرى للبيهقي/كتاب الجنائز/حدیث: 6802]

حصین بن عبد الرحمن کہتے ہیں: میں نے ابو مالک غفاری رضی اللہ عنہ سے سنا، وہ کہتے ہیں کہ احد کے مقتولین میں سے نو لائے گئے اور دسویں ان میں حمزہ رضی اللہ عنہ تھے، پھر رسول اللہ صلی اللہ علیہ وسلم نے ان کا جنازہ پڑھا، پھر وہ اٹھائے گئے اور مزید نو کو لایا گیا، ان پر جنازہ پڑھا گیا اور حمزہ رضی اللہ عنہ اپنی جگہ پر ہی تھے جب نماز جنازہ پڑھی گئی۔ [السنن الكبرى للبيهقي/كتاب الجنائز/حدیث: 6803]

حضرت حصین، ابو مالک غفاری رضی اللہ عنہ سے بیان کرتے ہیں کہ انہوں نے کہا: رسول اللہ صلی اللہ علیہ وسلم نے مقتولینِ احد میں دس دس کی نمازِ جنازہ پڑھی اور ہر دس میں دسویں حمزہ رضی اللہ عنہ تھے، یہاں تک کہ آپ صلی اللہ علیہ وسلم نے ستر مرتبہ آپ کا جنازہ پڑھا۔
اس باب میں یہ سب سے صحیح روایت ہے اور یہ مرسل ہے۔
عطاء، شعبی سے بیان کرتے ہیں کہ نبی صلی اللہ علیہ وسلم نے احد کے دن حمزہ رضی اللہ عنہ پر ستر جنازے پڑھے، آغاز بھی حمزہ رضی اللہ عنہ کے جنازے سے کیا، پھر آپ صلی اللہ علیہ وسلم دیگر شہداء کو منگواتے اور جنازے پڑھتے اور حمزہ رضی اللہ عنہ اسی جگہ پر رہے۔
یہ بھی منقطع ہے، جبکہ سیدنا جابر رضی اللہ عنہ کی حدیث موصول ہے اور ان کے والد شہدائے احد میں سے تھے۔ [السنن الكبرى للبيهقي/كتاب الجنائز/حدیث: 6804]

سیدنا عبداللہ بن عباس رضی اللہ عنہما کہتے ہیں کہ غزوہِ احد میں جب سیدنا حمزہ رضی اللہ عنہ شہید ہوئے تو سیدہ صفیہ رضی اللہ عنہا انہیں تلاش کرتی ہوئی آئیں اور وہ نہیں جانتی تھیں کہ سیدنا حمزہ رضی اللہ عنہ کے ساتھ کیا ہوا ہے، تو وہ سیدنا علی رضی اللہ عنہ اور سیدنا زبیر رضی اللہ عنہ سے ملیں، تو سیدنا علی رضی اللہ عنہ نے سیدنا زبیر رضی اللہ عنہ سے کہا: اپنی ماں کو بتا دو، تو سیدنا زبیر رضی اللہ عنہ نے کہا: ”نہیں، بلکہ تم اپنی پھوپھی کو بتاؤ۔“ راوی کہتے ہیں: سیدہ صفیہ رضی اللہ عنہا نے پوچھا کہ حمزہ (رضی اللہ عنہ) کے بارے میں کیا ہوا؟ تو ان دونوں نے ایسا ظاہر کیا گویا وہ کچھ جانتے نہیں، تو نبی کریم صلی اللہ علیہ وسلم تشریف لائے۔ آپ صلی اللہ علیہ وسلم نے فرمایا: ”میں اس کی عقل کے بارے میں ڈرتا ہوں (کہ کہیں حواس نہ کھو بیٹھے)۔“ پھر آپ صلی اللہ علیہ وسلم نے اپنا ہاتھ ان کے سینے پر رکھا اور دعا کی۔ راوی کہتے ہیں: پھر سیدہ صفیہ رضی اللہ عنہا نے «إِنَّا لِلَّهِ وَإِنَّا إِلَيْهِ رَاجِعُونَ» ”بے شک ہم اللہ ہی کے لیے ہیں اور اسی کی طرف لوٹنے والے ہیں“ پڑھی اور رو دیں۔ راوی کہتے ہیں: پھر آپ صلی اللہ علیہ وسلم ان کے پاس آئے اور رک گئے اور سیدنا حمزہ رضی اللہ عنہ کا مثلہ کیا گیا تھا، تو آپ صلی اللہ علیہ وسلم نے فرمایا: ”اگر عورتوں کی جزع فزع (کا ڈر) نہ ہوتا تو میں اسے اسی حال میں چھوڑ دیتا، یہاں تک کہ اسے درندوں کے پیٹوں اور پرندوں کے پوٹوں سے اکٹھا کیا جاتا۔“ راوی کہتے ہیں: پھر آپ صلی اللہ علیہ وسلم نے مقتولین کے متعلق حکم دیا اور جنازہ پڑھا، تو نو مقتولین کو رکھا جاتا اور دسویں سیدنا حمزہ رضی اللہ عنہ ہوتے، پھر آپ صلی اللہ علیہ وسلم ان پر سات تکبیرات کہتے تو ان کو اٹھا لیا جاتا اور سیدنا حمزہ رضی اللہ عنہ کو چھوڑ دیا جاتا، پھر مزید نو کو لایا جاتا، ان پر بھی آپ صلی اللہ علیہ وسلم سات تکبیرات کہتے یہاں تک کہ آپ صلی اللہ علیہ وسلم سب سے فارغ ہو گئے۔
میں اسے صرف ابوبکر بن عیاش کی یزید بن ابی زیاد سے روایت ہی سے جانتا ہوں اور یہ دونوں حافظ (پختہ یادداشت والے) نہیں تھے۔ [السنن الكبرى للبيهقي/كتاب الجنائز/حدیث: 6805]

سیدنا عبداللہ بن حارث رضی اللہ عنہ کہتے ہیں: رسول اللہ صلی اللہ علیہ وسلم نے سیدنا حمزہ رضی اللہ عنہ کا جنازہ پڑھا اور نو تکبیرات پڑھیں۔
یہ (روایت) محفوظ ہونے کے زیادہ لائق ہے اور یہ منقطع ہے۔ [السنن الكبرى للبيهقي/كتاب الجنائز/حدیث: 6806]

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے سیدنا حمزہ رضی اللہ عنہ کی نماز جنازہ پڑھی اور اس پر سات تکبیرات کہیں، کسی بھی مقتول کو نہیں لایا گیا مگر سیدنا حمزہ رضی اللہ عنہ اس کے ساتھ ہوتے اور آپ صلی اللہ علیہ وسلم جنازہ پڑھتے، یہاں تک کہ ان کے بہتر (72) جنازے پڑھے۔
یہ ضعیف ہے اور محمد بن اسحاق بن یسار جب اپنے شیخ کا نام ذکر نہ کریں تو ان کی روایت قابلِ اعتبار نہیں۔
حسن بن عمارہ، حکم سے اور وہ مقسم سے اور وہ سیدنا عبداللہ بن عباس رضی اللہ عنہما سے بیان کرتے ہیں کہ نبی کریم صلی اللہ علیہ وسلم نے احد کے مقتولین کا جنازہ پڑھا، مگر حسن بن عمارہ ضعیف ہے، اس کی حدیث کو حجت نہیں بنایا جا سکتا۔ [السنن الكبرى للبيهقي/كتاب الجنائز/حدیث: 6807]

ابو داؤد کہتے ہیں کہ مجھ سے شعبہ نے کہا: ”جریر بن حازم کے پاس جاؤ اور ان سے کہو: تمہارے لیے حسن بن عمارہ سے روایت کرنا جائز نہیں، کیونکہ وہ بہت جھوٹا ہے۔“ محمود کہتے ہیں: میں نے ابو داؤد سے کہا: یہ کیسے؟ انہوں نے کہا: میں نے شعبہ سے پوچھا: اس کے جھوٹ کی علامت کیا ہے؟ انہوں نے کہا: ”اس نے حکم سے ایسی چیزیں روایت کیں جن کی میں نے کوئی اصل نہیں پائی۔ میں نے حکم سے پوچھا: کیا نبی کریم صلی اللہ علیہ وسلم نے احد کے مقتولین کی نماز جنازہ پڑھی تھی؟ انہوں نے کہا: نہیں۔ جبکہ حسن بن عمارہ نے کہا: مجھ سے حکم نے مقسم سے اور انہوں نے سیدنا عبداللہ بن عباس رضی اللہ عنہما سے بیان کیا کہ نبی کریم صلی اللہ علیہ وسلم نے احد کے مقتولین کی نماز جنازہ پڑھی۔ اور میں نے حکم سے پوچھا: زنا سے پیدا ہونے والی اولاد کے بارے میں آپ کیا کہتے ہیں؟ انہوں نے کہا: انہیں آزاد کیا جائے گا۔ میں نے کہا: کس سے (یہ روایت ہے)؟ انہوں نے کہا: یہ اہلِ بصرہ کی حدیث میں سیدنا علی رضی اللہ عنہ سے روایت کیا جاتا ہے۔ جبکہ حسن بن عمارہ نے کہا: مجھ سے حکم نے یحییٰ بن جزار سے اور انہوں نے سیدنا علی رضی اللہ عنہ سے بیان کیا کہ انہیں آزاد کیا جائے گا۔“ [السنن الكبرى للبيهقي/كتاب الجنائز/حدیث: 6808]

عقبہ بن عامر رضی اللہ عنہ سے روایت ہے کہ ایک دن آپ صلی اللہ علیہ وسلم نکلے اور شہدائے احد پر نماز پڑھی جیسے نماز جنازہ ادا کی جاتی ہے، پھر آپ صلی اللہ علیہ وسلم منبر کی طرف پلٹے اور آپ صلی اللہ علیہ وسلم نے فرمایا: ”میں تمہارا پیش رو ہوں اور میں تم پر گواہ ہوں، اللہ کی قسم! اب میں حوضِ کوثر کو دیکھ رہا ہوں اور بے شک میں زمین کے خزانوں کی چابیاں دیا گیا ہوں (یا آپ صلی اللہ علیہ وسلم نے زمین کی چابیاں فرمایا) اور فرمایا: اللہ کی قسم! میں نہیں ڈرتا کہ تم میرے بعد شرک کرو گے، بلکہ میں ڈرتا ہوں کہ تم دنیا میں پھنس جاؤ گے۔“ [السنن الكبرى للبيهقي/كتاب الجنائز/حدیث: 6809]

سیدنا عقبہ بن عامر رضی اللہ عنہ کہتے ہیں کہ آپ صلی اللہ علیہ وسلم نے آٹھ سال بعد مقتولینِ احد کی نماز جنازہ پڑھائی، جیسے کوئی زندوں اور مردوں کو الوداع کرنے والا ہو۔ پھر آپ صلی اللہ علیہ وسلم منبر پر تشریف لائے اور فرمایا: ”بیشک میں تمہارا پیش رو ہوں اور میں تم پر گواہ ہوں اور تمہارا وعدہ حوض پر ہے اور میں اسے اس جگہ سے دیکھ رہا ہوں اور میں تم پر اس سے نہیں ڈرتا کہ تم شرک کرو گے، لیکن میں تو تم پر ڈرتا ہوں کہ تم دنیا میں پھنس جاؤ گے۔“ اور یہ آخری نظر تھی جو میں نے آپ صلی اللہ علیہ وسلم پر ڈالی۔ سیدنا عقبہ رضی اللہ عنہ بیان کرتے ہیں کہ آخری مرتبہ میں نے آپ صلی اللہ علیہ وسلم کو منبر پر دیکھا۔ [السنن الكبرى للبيهقي/كتاب الجنائز/حدیث: 6810]