عروہ رحمہ اللہ فرماتے ہیں: یہ رسول اللہ صلی اللہ علیہ وسلم کے مغازی کا تذکرہ ہے، جن میں آپ نے جہاد کیا (دوسری سند میں) ابن شہاب رحمہ اللہ کہتے ہیں: یہ رسول اللہ صلی اللہ علیہ وسلم کے مغازی کا تذکرہ ہے، جن میں آپ نے جہاد کیا۔ [السنن الكبرى للبيهقي/كتاب الحجر/حدیث: 11304]

امام مالک بن انس رحمہ اللہ فرماتے ہیں: غزوہ بدر آپ صلی اللہ علیہ وسلم کے مدینہ ہجرت کر کے آنے کے ڈیڑھ سال بعد ہوئی اور غزوہ احد ایک سال بعد ہوئی اور خندق چار سال بعد اور بنی مصطلق پانچ سال بعد اور غزوہ خیبر چھٹے سال اور حدیبیہ بھی اسی سال اور فتح مکہ آٹھویں سال اور غزوہ بنو قریظہ خندق والے سال ہوا۔ [السنن الكبرى للبيهقي/كتاب الحجر/حدیث: 11305]

محمد بن اسحاق فرماتے ہیں: غزوہ احد شوال 3 ھ میں ہوا اور غزوہ خندق شوال 5 ھ میں ہوا۔ شیخ فرماتے ہیں: غزوہ خندق کے بارے میں عروہ، ابن شہاب اور مالک بن انس کا قول ہے کہ وہ 4 ھ میں ہوا۔ یہ اس شخص کے قول سے بہتر ہے جو کہتا ہے کہ غزوہ خندق پانچ ھ میں ہوا تھا؛ کیونکہ ان کا قول سیدنا ابن عمر رضی اللہ عنہما کی حدیث کے موافق ہے۔ ہاں اہل علم نے دونوں اقوال کے درمیان تطبیق دینے کی کوشش کی ہے۔ غزوہ احد ہجرت کے اڑھائی سال بعد ہوئی اور خندق ساڑھے چار سال بعد ہوئی اور جس نے چار سال کہا ہے، اس کا مطلب یہ ہے کہ چار سال مکمل کرنے کے بعد اور پانچواں سال ختم ہونے سے پہلے؛ اور جس شخص نے پانچ سال کہے ہیں۔ سیدنا ابن عمر رضی اللہ عنہما کا کہنا ہے کہ میں 14 سال کا تھا، اس کا مطلب یہ تھا کہ میں چودھویں میں داخل ہو چکا تھا اور غزوہ خندق میں ان کا کہنا کہ میں 15 سال کا تھا۔ اس کا مطلب ہے کہ میں 15 مکمل کر چکا تھا، لیکن انہوں نے زیادتی نقل نہیں کی؛ کیونکہ وہ دلالت حال اور پندرہ سال بغیر زیادتی کے کا مطلب سمجھتے تھے۔ «وَاللّٰہُ اَعْلَمُ»
اور یہ میرے نزدیک زیادہ درست ہے کیونکہ بتایا گیا ہے کہ احد اور خندق کے درمیان دو سال کا فرق تھا۔ [السنن الكبرى للبيهقي/كتاب الحجر/حدیث: 11306]

سیدنا ابوہریرہ رضی اللہ عنہ مرفوعاً نقل فرماتے ہیں کہ ”تین چیزوں سے قلم اٹھا لیا گیا ہے: بچے سے حتی کہ احتلام ہو جائے، اگر احتلام نہ ہو تو اٹھارہ سال کا ہو جائے تب تک۔“
سیدنا انس رضی اللہ عنہ مرفوعاً روایت فرماتے ہیں: ”بچہ جب پندرہ سال کا ہو جائے تو اس پر حد قائم ہو گی۔“
پہلی روایت کو محمد بن قاسم طائکانی نے ایک لمبی موضوع (من گھڑت) حدیث میں ذکر کیا ہے، اور یہ محمد بن قاسم حدیثیں گھڑنے میں مشہور تھا، ہم رسوائی سے اللہ کی پناہ مانگتے ہیں۔ اور سیدنا انس رضی اللہ عنہ والی روایت کی سند ضعیف ہے، صحیح نہیں۔ [السنن الكبرى للبيهقي/كتاب الحجر/حدیث: 11307]

اللہ تعالیٰ کا فرمان ہے: ﴿حَتَّى إِذَا بَلَغُوا النِّكَاحَ﴾ ”یہاں تک کہ جب وہ نکاح (کی عمر) کو پہنچ جائیں۔“ [سورة النساء: 6]
امام مجاہد رحمہ اللہ نے فرمایا: ”(اس سے مراد) بلوغت (احتلام) ہے۔“ [السنن الكبرى للبيهقي/كتاب الحجر/حدیث: Q11308]

سیدنا علی رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا: ”تین آدمیوں سے قلم اٹھا لیا گیا ہے: سوئے ہوئے سے حتیٰ کہ وہ نیند سے بیدار ہو جائے اور بچے سے حتیٰ کہ اسے احتلام ہو اور مجنوں سے حتیٰ کہ اسے ہوش آ جائے۔“ [السنن الكبرى للبيهقي/كتاب الحجر/حدیث: 11308]

سیدنا علی رضی اللہ عنہ فرماتے ہیں: میں نے رسول اللہ صلی اللہ علیہ وسلم سے یاد کیا کہ ”احتلام کے بعد یتیمی نہیں رہتی اور نہ ہی دن بھر رات تک خاموش رہنا ہے۔“ [السنن الكبرى للبيهقي/كتاب الحجر/حدیث: 11309]

سیدہ عائشہ رضی اللہ عنہا فرماتی ہیں: ”جب بچی کو احتلام ہو تو اس پر اس طرح پردہ کرنا فرض ہو جاتا ہے جس طرح اس کی ماؤں پر ہوتا ہے۔“ [السنن الكبرى للبيهقي/كتاب الحجر/حدیث: 11310]

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے فرمایا: ”حیض والی (بالغ عورت) کی نماز بغیر دوپٹے کے نہیں ہوتی۔“ [السنن الكبرى للبيهقي/كتاب الحجر/حدیث: 11311]

محمد فرماتے ہیں کہ سیدہ عائشہ رضی اللہ عنہا صفیہ اُمِ طلحہ کے پاس گئیں اور اس کی بیٹیاں دیکھیں تو فرمایا: میرے حجرے میں ایک لڑکی بیٹھی ہوئی تھی کہ رسول اللہ صلی اللہ علیہ وسلم حجرے میں داخل ہوئے۔ آپ نے میری طرف اپنی چادر پھینکی اور فرمایا: ”اس کے دو حصے کر دے، ایک حصہ اسے دے اور ایک حصہ اسے دے دینا جو اُمِ سلمیٰ کے پاس ہے۔ مجھے یقین ہے کہ یہ بالغ ہو چکی ہے“ یا فرمایا: ”میرے خیال میں یہ دونوں بالغ ہو چکی ہیں۔“ [السنن الكبرى للبيهقي/كتاب الحجر/حدیث: 11312]