حبیب بن ابی ثابت اپنے بعض اصحاب سے نقل فرماتے ہیں کہ ایک شخص سیدنا علی رضی اللہ عنہ کے پاس آیا، اس نے کہا: میں نے اپنی بیوی کو ہزار طلاقیں دے دیں۔ انہوں نے فرمایا: تین طلاقوں نے تیرے اوپر تیری بیوی کو حرام کر دیا اور باقی ساری طلاقیں اپنی بیویوں کے درمیان تقسیم کر دے۔ [السنن الكبرى للبيهقي/كتاب الخلع والطلاق/حدیث: 14961]

علقمہ بن قیس رحمہ اللہ فرماتے ہیں کہ ایک شخص سیدنا عبداللہ بن مسعود رضی اللہ عنہ کے پاس آیا اور اس نے کہا کہ ایک آدمی نے گزشتہ رات اپنی بیوی کو سو طلاقیں دے دی ہیں، انہوں نے دریافت فرمایا کہ کیا اس نے ایک ہی مرتبہ میں یہ بات کہی تھی؟ اس نے کہا: جی ہاں، سیدنا عبداللہ بن مسعود رضی اللہ عنہ نے فرمایا کہ کیا تمہارا ارادہ یہ تھا کہ تمہاری بیوی تم سے جدا ہو جائے؟ اس نے عرض کیا: جی ہاں، سیدنا عبداللہ بن مسعود رضی اللہ عنہ نے فرمایا کہ وہ ویسے ہی ہے جیسے تو نے کہہ دیا۔ راوی کہتے ہیں کہ پھر ایک دوسرا شخص آیا اور اس نے کہا کہ ایک مرد نے گزشتہ رات اپنی بیوی کو ستاروں کی تعداد کے برابر طلاقیں دے دی ہیں۔ سیدنا عبداللہ بن مسعود رضی اللہ عنہ نے دریافت فرمایا کہ کیا تو نے اپنی بیوی کو ایک ہی مرتبہ یہ بات کہی ہے؟ اس نے کہا: جی ہاں، سیدنا عبداللہ بن مسعود رضی اللہ عنہ نے فرمایا کہ کیا تو نے اپنی بیوی کو الگ کرنے کا ارادہ کیا تھا؟ اس نے کہا: جی ہاں، سیدنا عبداللہ بن مسعود رضی اللہ عنہ نے فرمایا کہ وہ ویسے ہی ہے جیسے تو نے کہا۔ محمد رحمہ اللہ کہتے ہیں کہ انہوں نے اہل زمین کی عورتوں کے متعلق بھی ایک بات کہی تھی، جسے میں یاد نہ رکھ سکا۔ سیدنا عبداللہ بن مسعود رضی اللہ عنہ فرماتے ہیں کہ اللہ رب العزت نے طلاق کا معاملہ واضح فرما دیا ہے، جس نے ویسے طلاق دی جیسا کہ اللہ رب العزت نے حکم دیا ہے تو اس کے لیے (حکم) واضح ہے، اور جس انسان پر معاملہ خلط ملط ہو گیا تو ہم نے بھی اس پر اسی طرح (فیصلہ) کر دیا۔ اللہ کی قسم! تم اپنے اوپر معاملے کو نہ الجھاؤ اور ہم تم سے وہی قبول کرتے ہیں جیسا کہ تم کہتے ہو۔ [السنن الكبرى للبيهقي/كتاب الخلع والطلاق/حدیث: 14962]

علقمہ رحمہ اللہ کہتے ہیں کہ ہم عبداللہ رضی اللہ عنہ کے پاس تھے، انہوں نے اس کا معنی ذکر کیا ہے اور الفاظ مختلف ہیں۔ [السنن الكبرى للبيهقي/كتاب الخلع والطلاق/حدیث: 14963]

سیدنا عبداللہ رضی اللہ عنہ فرماتے ہیں کہ مطلقہ ثلاثہ دخول سے پہلے اس عورت کے مرتبہ پر ہے جس کے ساتھ دخول کیا گیا۔ [السنن الكبرى للبيهقي/كتاب الخلع والطلاق/حدیث: 14964]

محمد بن ایاس بن بکیر کہتے ہیں کہ ایک شخص نے دخول سے پہلے اپنی بیوی کو تین طلاقیں دے دیں۔ پھر بعد میں اسی عورت سے نکاح کا ارادہ بنایا تو فتویٰ پوچھنے کے لیے آیا، میں بھی اس کے ساتھ گیا کہ میں اس کے لیے مسئلہ پوچھوں تو اس نے ابوہریرہ رضی اللہ عنہ اور عبداللہ بن عباس رضی اللہ عنہما سے اس بارے میں سوال کیا تو ان دونوں نے فرمایا: ”تو اس عورت سے نکاح نہ کر یہاں تک کہ وہ کسی دوسرے شخص سے نکاح کرلے۔“ اس نے کہا کہ میری جانب سے صرف اس کو ایک طلاق تھی تو ابن عباس رضی اللہ عنہما فرمانے لگے: ”آپ نے اپنے ہاتھ سے جو زائد ہے بھیجی ہے۔“ [السنن الكبرى للبيهقي/كتاب الخلع والطلاق/حدیث: 14965]

معاویہ بن ابی عیاش انصاری رحمہ اللہ فرماتے ہیں کہ وہ سیدنا عبداللہ بن زبیر اور سیدنا عاصم بن عمر رضی اللہ عنہم کے ساتھ بیٹھے تھے کہ ان کے پاس محمد بن ایاس بن بکیر آئے، انہوں نے کہا کہ ایک دیہاتی شخص نے دخول سے پہلے اپنی بیوی کو تین طلاقیں دے دی ہیں، تم دونوں کا اس بارے میں کیا خیال ہے؟ سیدنا عبداللہ بن زبیر رضی اللہ عنہما نے کہا کہ اس معاملہ میں ہمارا کوئی قول نہیں، آپ سیدنا ابوہریرہ رضی اللہ عنہ اور سیدنا ابن عباس رضی اللہ عنہما کے پاس جائیں، میں ان دونوں کو سیدہ عائشہ رضی اللہ عنہا کے پاس چھوڑ کر آیا ہوں، ان سے جا کر سوال کرو، پھر ہمیں بھی آکر بتانا۔ وہ گئے اور جا کر ان سے سوال کیا تو سیدنا ابن عباس رضی اللہ عنہما سیدنا ابوہریرہ رضی اللہ عنہ سے کہنے لگے: اے ابوہریرہ رضی اللہ عنہ! ان کو فتویٰ دو کہ آپ کے پاس مشکل معاملہ آیا ہے۔ سیدنا ابوہریرہ رضی اللہ عنہ فرماتے ہیں کہ ایک طلاق میاں بیوی کو جدا کر دیتی ہے اور تین طلاقیں بیوی کو حرام کر دیتی ہیں یہاں تک کہ وہ عورت کسی دوسرے شخص سے نکاح کرے۔ سیدنا ابن عباس رضی اللہ عنہما نے بھی اسی طرح فرمایا۔ [السنن الكبرى للبيهقي/كتاب الخلع والطلاق/حدیث: 14966]

نعمان بن ابی عیاش انصاری، عطاء بن یسار رحمہ اللہ سے نقل فرماتے ہیں کہ ایک شخص مسئلہ پوچھنے کے لیے سیدنا عبداللہ بن عمرو بن عاص رضی اللہ عنہما کے پاس آیا کہ کسی مرد نے مجامعت سے پہلے اپنی بیوی کو تین طلاقیں دے دی ہیں، عطاء رحمہ اللہ کہتے ہیں کہ میں نے کہا کہ کنواری کی طلاق ایک ہوتی ہے، تو سیدنا عبداللہ بن عمرو رضی اللہ عنہما نے مجھ سے کہا کہ آپ تو قصہ گو ہیں، ایک طلاق بیوی کو جدا کردیتی ہے اور تین طلاقیں حرام کردیتی ہیں یہاں تک کہ وہ عورت کسی دوسرے مرد سے نکاح کر لے۔ [السنن الكبرى للبيهقي/كتاب الخلع والطلاق/حدیث: 14967]

نافع رحمہ اللہ، سیدنا عبداللہ بن عمر رضی اللہ عنہما سے نقل فرماتے ہیں کہ جب مرد دخول سے پہلے اپنی بیوی کو تین طلاقیں دے دے تو یہ عورت اس شخص کے لیے حلال نہیں جب تک کسی دوسرے شخص سے نکاح نہ کر لے۔ [السنن الكبرى للبيهقي/كتاب الخلع والطلاق/حدیث: 14968]

نافع رحمہ اللہ فرماتے ہیں کہ ایک شخص نے سیدنا عبداللہ بن عمر رضی اللہ عنہما سے سوال کیا کہ میں نے اپنی بیوی کو حالت حیض میں تین طلاقیں دے دی ہیں، وہ فرماتے ہیں: تو نے اپنے رب کی نافرمانی کی اور اپنی بیوی کو جدا کر دیا۔ [السنن الكبرى للبيهقي/كتاب الخلع والطلاق/حدیث: 14969]

قیس بن ابی حازم رحمہ اللہ فرماتے ہیں کہ ایک شخص نے میری موجودگی میں مغیرہ بن شعبہ رضی اللہ عنہ سے ایسے شخص کے بارے میں جس نے اپنی بیوی کو سو طلاقیں دے دیں، پوچھا تو انہوں نے فرمایا: تین طلاقیں تو بیوی کو حرام کر دیتی ہیں اور ٩٧ زیادہ ہیں۔ [السنن الكبرى للبيهقي/كتاب الخلع والطلاق/حدیث: 14970]