امام شافعی رحمہ اللہ نے فرمایا: ”اس کی گواہی رد کر دی جائے گی۔“ [السنن الكبرى للبيهقي/كتاب الشهادات/حدیث: Q21139]

سیدنا عبداللہ بن عمرو بن عاص رضی اللہ عنہما فرماتے ہیں کہ رسول اللہ صلی اللہ علیہ وسلم نے فرمایا: ”ظلم سے بچو، کیونکہ ظلم قیامت والے دن اندھیروں کی شکل میں ہوگا اور فحش گوئی سے بچو کیونکہ اللہ تعالیٰ فحش گوئی کو پسند نہیں فرماتا اور بخل سے بچو کیونکہ اس نے تم سے پہلے لوگوں کو ہلاک کر دیا، اس نے ان کو قطع رحمی، بخل اور گناہ کا حکم دیا تو انہوں نے یہ کام کیے۔“ ایک آدمی کھڑا ہوا، اس نے پوچھا: ”اے اللہ کے رسول صلی اللہ علیہ وسلم ! کون سا اسلام افضل ہے؟“ امام شعبہ رحمہ اللہ اس حدیث کے بارے میں فرماتے ہیں (کہ آپ صلی اللہ علیہ وسلم نے فرمایا): ”جس کی زبان اور ہاتھ سے مسلمان محفوظ رہیں۔“ امام مسعودی رحمہ اللہ فرماتے ہیں (کہ آپ صلی اللہ علیہ وسلم نے فرمایا): ”مسلمان اس کی زبان اور ہاتھ سے محفوظ رہیں۔“ پھر وہی شخص یا اس کے علاوہ دوسرا شخص کھڑا ہوا اور کہنے لگا: ”اے اللہ کے رسول صلی اللہ علیہ وسلم ! کون سی ہجرت افضل ہے؟“ تو آپ صلی اللہ علیہ وسلم نے فرمایا: ”جس کو تیرا رب ناپسند کرے اس کو چھوڑ دے۔“ رسول اللہ صلی اللہ علیہ وسلم نے فرمایا: ”ہجرت کی دو قسمیں ہیں: 1 شہری آدمی کا ہجرت کرنا، 2 دیہاتی کا ہجرت کرنا۔“
”دیہاتی دعوت کو قبول کرے گا جب اس کو بلایا جائے گا اور حکم کی تعمیل کرے گا جب اس کو حکم دیا جائے گا، اور شہری کی آزمائش بڑی ہوتی ہے اور اس کا اجر بھی زیادہ ہوتا ہے۔“
امام مسعودی رحمہ اللہ فرماتے ہیں کہ ایک آدمی نے رسول اللہ صلی اللہ علیہ وسلم کو آواز دی: ”اے اللہ کے رسول صلی اللہ علیہ وسلم ! افضل شہید کون ہے؟“ آپ صلی اللہ علیہ وسلم نے فرمایا: ”جس کے گھوڑے کی کونچیں پھاڑ دی جائیں اور خون بہا دیا جائے۔“ [السنن الكبرى للبيهقي/كتاب الشهادات/حدیث: 21139]

سیدنا عبداللہ رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا: ”مومن لعن طعن کرنے والا اور فحش گوئی کرنے والا نہیں ہوتا۔“ [السنن الكبرى للبيهقي/كتاب الشهادات/حدیث: 21140]

امام شعبی رحمہ اللہ سے منقول ہے کہ ہم بیت اللہ کے پاس اشعار پڑھ رہے تھے۔ ہمارے پاس ابن زبیر رضی اللہ عنہما آئے اور فرمانے لگے: کیا اللہ کے حرم اور بیت اللہ کے پاس تم اشعار پڑھ رہے ہو؟ تو ایک انصاری صحابی جو ہمارے ساتھ موجود تھے، کہنے لگے کہ اے ابن زبیر! کوئی حرج نہیں اگر آپ اپنے آپ کو خراب نہ کریں، کیونکہ نبی کریم صلی اللہ علیہ وسلم ”ان اشعار سے منع کرتے تھے، جن کا موضوع عورتیں ہوں اور اس میں مال خرچ کیا جائے۔“ [السنن الكبرى للبيهقي/كتاب الشهادات/حدیث: 21141]

امام شافعی رحمہ اللہ نے فرمایا: ”کیونکہ یہ ممکن ہے کہ وہ (اپنے اشعار میں) اپنی بیوی اور اپنی لونڈی کے لیے عشقیہ اشعار کہے۔“ [السنن الكبرى للبيهقي/كتاب الشهادات/حدیث: Q21142]

کعب بن زہیر بن ابی سلمیٰ مزنی رضی اللہ عنہ سے روایت ہے کہ کعب اور بجیر رضی اللہ عنہما، جو زہیر کے بیٹے تھے، نکلے۔ پھر لمبی حدیث ذکر کی، جس میں بجیر رضی اللہ عنہ کے اسلام لانے کا قصہ ہے اور اس میں کعب رضی اللہ عنہ کے اشعار کا تذکرہ ہے۔ پھر کعب رضی اللہ عنہ کا نبی کریم صلی اللہ علیہ وسلم کے پاس آنا، اسلام قبول کرنا اور اس قصیدے کے اشعار پڑھنا جو سب سے پہلے انہوں نے لکھے تھے۔
1 سعاد جدا ہوئی تو میرا دل آج بہت اداس ہے
وہ اس کے پاس قید ہے اور اس کی قید سے نکلتا نہیں ہے
2 سعاد صبح کے وقت جدا ہوئی جب وہ (قافلے والے) روانہ ہوئے
تو میں اس وقت ناک میں گنگنا رہا تھا اور سرمگیں آنکھوں کے پپوٹے جھکے ہوئے تھے
3 جب وہ تبسم فرماتی تو دانتوں کی چمک ظاہر ہو جاتی
گویا کہ وہ میٹھے پانی کا چشمہ ہے جو شیشے سے ڈھکا ہوا ہے
پھر انہوں نے ایک لمبا قصیدہ کہا جس میں اڑتالیس اشعار تھے اور اس میں یہ اشعار بھی تھے۔
1 مجھے بتایا گیا کہ اللہ کے رسول صلی اللہ علیہ وسلم نے مجھ سے وعدہ کیا ہے
اور معافی اللہ کے رسول صلی اللہ علیہ وسلم کے پاس ہے جس کی امید کی جاتی ہے
2 اس رسول صلی اللہ علیہ وسلم کے پاس ٹھہرو جس نے تجھے ایسی چیز عطا کی ہے
جس میں وعظ نصیحت اور مکمل بیان ہے
3 تو چغل خور کی باتوں کو قبول نہ کر اور
نہ ہی میں نے کوئی جرم کیا ہے اگرچہ من گھڑت باتیں مجھ سے کثرت سے سرزد ہوئی ہیں
4 یہ رسول صلی اللہ علیہ وسلم نور (ہدایت) ہیں جن سے روشنی حاصل کی جاتی ہے
اور وہ اللہ کی تلواروں میں سے سونتی ہوئی ایک تلوار ہیں
5 قریش کے نوجوانوں میں سے کہنے والے نے کہا
جب سے انہوں نے اسلام قبول کیا اس وقت سے مکہ کی وادی لرز رہی ہے۔
موسیٰ بن عقبہ رحمہ اللہ سے روایت ہے کہ کعب بن زہیر رضی اللہ عنہ نے نبی کریم صلی اللہ علیہ وسلم کے پاس سعاد والے اشعار مسجد نبوی میں پڑھے، جب ان اشعار پر پہنچے:
1 بیشک رسول صلی اللہ علیہ وسلم نور (ہدایت) ہیں جن سے روشنی حاصل کی جاتی ہے اور اللہ کی تلواروں میں سے ننگی تلوار ہیں۔
2 قریش کے نوجوانوں میں سے کسی نے کہا، جب سے وہ مسلمان ہوئے ہیں (یعنی صحابہ رضی اللہ عنہم) تب سے مکہ کی وادی لرز رہی ہے۔
تو رسول اللہ صلی اللہ علیہ وسلم نے اپنے ہاتھوں سے لوگوں کو اشارہ کیا کہ وہ آئیں اور اس سے (اشعار) سنیں۔ [السنن الكبرى للبيهقي/كتاب الشهادات/حدیث: 21142]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے فرمایا: ”تم میں سے کسی ایک کا پیٹ پیپ سے بھر جائے یہ بہتر ہے کہ اشعار سے بھرا جائے۔“ [السنن الكبرى للبيهقي/كتاب الشهادات/حدیث: 21143]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا: ”آدمی کا پیٹ پیپ سے بھرا ہو، یہ اس سے بہتر ہے کہ اس میں اشعار ہوں۔“ [السنن الكبرى للبيهقي/كتاب الشهادات/حدیث: 21144]

سیدنا ابوسعید خدری رضی اللہ عنہ فرماتے ہیں کہ ہم نبی کریم صلی اللہ علیہ وسلم کے ساتھ عرج مقام پر چل رہے تھے، اچانک ایک شاعر سامنے آگیا، آپ صلی اللہ علیہ وسلم نے فرمایا: ”شیطان کو پکڑو کیونکہ آدمی کے پیٹ کا پیپ سے بھرا ہونا بہتر ہے کہ وہ اشعار سے بھرا ہوا ہو۔“ [السنن الكبرى للبيهقي/كتاب الشهادات/حدیث: 21145]

شعبی رحمہ اللہ سے منقول ہے کہ رسول اللہ صلی اللہ علیہ وسلم نے فرمایا: ”تم میں سے ایک کا پیٹ پیپ سے بھر جائے یہاں تک کہ اسے خراب کر دے، یہ اس کے لیے اس سے بہتر ہے کہ وہ اشعار سے بھرا ہوا ہو۔“ یعنی ایسے اشعار جس میں نبی صلی اللہ علیہ وسلم کی مذمت بیان کی گئی ہو۔
ابو عبید رحمہ اللہ فرماتے ہیں: میرے نزدیک اس حدیث کا مطلب اس قول کے علاوہ ہے، کیونکہ اگر نصف شعر بھی ہو جس میں نبی صلی اللہ علیہ وسلم کی مذمت بیان کی گئی ہو تو وہ کفر ہے، لیکن میرے نزدیک یہ ہے کہ انسان کے دل پر اشعار غالب آ جائیں جس کی بنا پر وہ اللہ کے ذکر اور قرآن کی تلاوت سے دور رہے، خواہ وہ کسی بھی قسم کے اشعار ہوں۔ [السنن الكبرى للبيهقي/كتاب الشهادات/حدیث: 21146]