سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”اگر یہ اندیشہ نہ ہوتا کہ تم ایک دوسرے کو دفن کرنا چھوڑ دو گے تو میں اللہ سے دعا کرتا کہ وہ تمہیں عذابِ قبر میں سے کچھ سنا دے۔“ [مسند أبي يعلى الموصلي/مسند أنس بن مالك/حدیث: 2996]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اپنی صفیں سیدھی رکھا کرو، کیونکہ صفوں کو برابر کرنا نماز کی تکمیل کا حصہ ہے۔“ [مسند أبي يعلى الموصلي/مسند أنس بن مالك/حدیث: 2997]

سیدنا انس رضی اللہ عنہ سے روایت ہے کہ ایک مرتبہ مدینہ منورہ میں خوف و ہراس کی فضا پیدا ہوئی تو رسول اللہ صلی اللہ علیہ وسلم نے ایک گھوڑا مستعار لیا جسے ’مندوب‘ کہا جاتا تھا، پھر رسول اللہ صلی اللہ علیہ وسلم نے ارشاد فرمایا: ”ہم نے (وہاں) کوئی خوف و ہراس کی بات نہیں دیکھی اور بلاشبہ ہم نے اس (گھوڑے) کو سمندر (کی طرح رواں اور تیز رفتار) پایا۔“ [مسند أبي يعلى الموصلي/مسند أنس بن مالك/حدیث: 2998]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میری بعثت اور قیامت ان دو انگلیوں کی مانند قریب قریب ہیں۔“ شعبہ رحمہ اللہ کہتے ہیں: میں نے قتادہ رحمہ اللہ کو یہ کہتے سنا: ”جیسے ان دونوں میں سے ایک انگلی دوسری سے کچھ بڑی ہے۔“ مجھے معلوم نہیں کہ انہوں نے یہ بات سیدنا انس رضی اللہ عنہ سے نقل کی تھی یا یہ خود قتادہ رحمہ اللہ کا قول تھا۔ [مسند أبي يعلى الموصلي/مسند أنس بن مالك/حدیث: 2999]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”تین خصلتیں ایسی ہیں کہ جس شخص میں بھی وہ موجود ہوں گی، اس نے ایمان کی حلاوت پالی: ایک یہ کہ وہ کسی شخص سے محض اللہ کی رضا کے لیے محبت کرے، دوسرا یہ کہ اسے اللہ اور اس کے رسول صلی اللہ علیہ وسلم اپنے ماسوا ہر چیز سے زیادہ محبوب ہوں، اور تیسرا یہ کہ اللہ تعالیٰ کی جانب سے کفر سے نجات عطا فرمائے جانے کے بعد وہ دوبارہ کفر کی طرف پلٹنے کے مقابلے میں آگ میں ڈالے جانے کو زیادہ پسند کرے۔“ [مسند أبي يعلى الموصلي/مسند أنس بن مالك/حدیث: 3000]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے اسی طرح (سابقہ حدیث کے ہم معنی) ارشاد فرمایا، البتہ اس روایت میں یہ الفاظ مروی ہیں کہ ”وہ ان (تین خصال) کے سبب ایمان کی مٹھاس پا لے گا“۔ [مسند أبي يعلى الموصلي/مسند أنس بن مالك/حدیث: 3001]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے انصار کو جمع فرمایا اور دریافت کیا: ”کیا تمہارے مجمع میں تمہارے علاوہ بھی کوئی غیر شخص موجود ہے؟“ انہوں نے عرض کی: ”نہیں، سوائے ہمارے ایک بھانجے کے۔“ تو رسول اللہ صلی اللہ علیہ وسلم نے ارشاد فرمایا: ”کسی قوم کا بھانجا انہی میں سے (شمار) ہوتا ہے۔“ پھر آپ صلی اللہ علیہ وسلم نے فرمایا: ”بے شک قریش کا زمانہِ جاہلیت اور (تکلیف دہ) مصیبت سے عہد ابھی قریب کا ہے، اس لیے میں نے چاہا کہ ان کی مالی تلافی کروں اور ان کی تالیفِ قلب کروں، کیا تم اس بات پر خوش نہیں ہو کہ لوگ تو دنیا کا مال و متاع لے کر جائیں اور تم رسول اللہ صلی اللہ علیہ وسلم کو اپنے ہمراہ اپنے گھروں کی طرف لے کر لوٹو؟ اگر تمام لوگ ایک وادی میں چلیں اور انصار کسی گھاٹی کا راستہ اختیار کریں، تو میں یقیناً انصار ہی کی گھاٹی والے راستے پر چلوں گا۔“ [مسند أبي يعلى الموصلي/مسند أنس بن مالك/حدیث: 3002]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم یہ دعا فرمایا کرتے تھے: «اللَّهُمَّ إِنَّ الْعَيْشَ عَيْشَ الْآخِرَةِ فَأَكْرِمِ الْأَنْصَارَ وَالْمُهَاجِرَهْ» ”اے اللہ! یقیناً حقیقی زندگی تو بس آخرت ہی کی زندگی ہے، اس لیے تو انصار اور مہاجرین کو عزت و اکرام سے نواز۔“ [مسند أبي يعلى الموصلي/مسند أنس بن مالك/حدیث: 3003]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم کی خدمتِ اقدس میں گوشت پیش کیا گیا تو آپ صلی اللہ علیہ وسلم کو بتایا گیا کہ یہ سیدہ بریرہ رضی اللہ عنہا کو بطورِ صدقہ دیا گیا تھا، جس پر آپ صلی اللہ علیہ وسلم نے ارشاد فرمایا: ”یہ ان کے لیے صدقہ ہے، اور (ان کی طرف سے ہمیں ملنے کی وجہ سے) ہمارے لیے ہدیہ ہے۔“ [مسند أبي يعلى الموصلي/مسند أنس بن مالك/حدیث: 3004]

سیدنا انس بن مالک رضی اللہ عنہ سے روایت ہے کہ انہوں نے فرمایا: ”میں نے رسول اللہ صلی اللہ علیہ وسلم ، سیدنا ابوبکر رضی اللہ عنہ، سیدنا عمر رضی اللہ عنہ اور سیدنا عثمان رضی اللہ عنہ کے پیچھے نماز ادا کی، وہ (نماز میں) قراءت کا آغاز ﴿بِسْمِ اللَّهِ الرَّحْمَنِ الرَّحِيمِ﴾ سے نہیں کیا کرتے تھے۔“ شعبہ رحمہ اللہ بیان کرتے ہیں کہ میں نے قتادہ رحمہ اللہ سے دریافت کیا کہ کیا آپ نے یہ حدیث خود سیدنا انس رضی اللہ عنہ سے سنی ہے؟ تو انہوں نے جواب دیا: جی ہاں، ہم نے خود ان سے اس کے متعلق سوال کیا تھا۔ [مسند أبي يعلى الموصلي/مسند أنس بن مالك/حدیث: 3005]