سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم کدو کو پسند فرماتے تھے“، وہ بیان کرتے ہیں کہ ایک مرتبہ آپ صلی اللہ علیہ وسلم کی خدمت میں کھانا پیش کیا گیا یا آپ صلی اللہ علیہ وسلم کی کسی کھانے پر دعوت کی گئی تو سیدنا انس رضی اللہ عنہ نے فرمایا کہ ”میں (برتن میں سے) کدو کے ٹکڑے تلاش کر کے انہیں چن چن کر آپ صلی اللہ علیہ وسلم کے سامنے رکھنے لگا کیونکہ میں جانتا تھا کہ آپ صلی اللہ علیہ وسلم اسے بے حد پسند فرماتے ہیں“۔ [مسند أبي يعلى الموصلي/مسند أنس بن مالك/حدیث: 3006]

سیدنا انس بن مالک رضی اللہ عنہ سے روایت ہے کہ ”دو شخص ایک نہایت تاریک رات میں نبی اللہ صلی اللہ علیہ وسلم کے پاس سے نکلے تو ان کے ساتھ چراغ کی مانند دو روشنیاں تھیں جو ان کے سامنے اجالا کر رہی تھیں، پھر جب وہ دونوں (راستے میں) ایک دوسرے سے جدا ہوئے تو ان میں سے ہر ایک کے ساتھ ایک ایک روشنی ہو گئی یہاں تک کہ وہ اپنے گھر پہنچ گئے۔“ [مسند أبي يعلى الموصلي/مسند أنس بن مالك/حدیث: 3007]

سیدنا انس بن مالک رضی اللہ عنہ سے روایت ہے کہ انہوں نے فرمایا: ”میں سیدنا ابو طلحہ رضی اللہ عنہ، سیدنا ابو دجانہ رضی اللہ عنہ اور سیدنا سہیل بن بیضاء رضی اللہ عنہ کو ان کے ایک چمڑے کے بڑے مشکیزے سے مشروب پلا رہا تھا جس میں کچی اور پکی کھجوروں کی ملی جلی شراب تھی، اسی اثنا میں ایک آنے والا ہمارے پاس آیا اور کہنے لگا کہ آج ایک اہم معاملہ پیش آیا ہے، ہم نے پوچھا کہ وہ کیا ہے؟ اس نے بتایا کہ شراب کو حرام قرار دے دیا گیا ہے، چنانچہ ہم نے فوری طور پر اسے بہا دیا، اور ہم ان دنوں اسی مشروب کو شراب ہی سمجھا کرتے تھے۔“ [مسند أبي يعلى الموصلي/مسند أنس بن مالك/حدیث: 3008]

سیدنا انس رضی اللہ عنہ سے روایت ہے کہ اللہ کے نبی صلی اللہ علیہ وسلم نے اہل عجم کی طرف خط لکھنے کا ارادہ فرمایا تو آپ صلی اللہ علیہ وسلم سے عرض کیا گیا کہ ”عجم کے لوگ مہر لگے ہوئے خط کے علاوہ کوئی تحریر قبول نہیں کرتے“، چنانچہ رسول اللہ صلی اللہ علیہ وسلم نے چاندی کی ایک انگوٹھی تیار کروائی، (سیدنا انس رضی اللہ عنہ فرماتے ہیں کہ) ”گویا میں (آج بھی) آپ صلی اللہ علیہ وسلم کے دستِ مبارک میں اس کی سفیدی اور چمک دیکھ رہا ہوں۔“ [مسند أبي يعلى الموصلي/مسند أنس بن مالك/حدیث: 3009]

سیدنا انس رضی اللہ عنہ سے روایت ہے کہ اللہ کے نبی صلی اللہ علیہ وسلم نے ارشاد فرمایا: ”ابنِ آدم بوڑھا ہو جاتا ہے مگر اس کی دو خصلتیں ہمیشہ جوان رہتی ہیں: مال کی حرص اور لمبی زندگی کی خواہش۔“ [مسند أبي يعلى الموصلي/مسند أنس بن مالك/حدیث: 3010]

سیدنا انس بن مالک رضی اللہ عنہ سے روایت ہے کہ اللہ کے نبی صلی اللہ علیہ وسلم نے (راستے میں) ایک کھجور پڑی ہوئی پائی تو آپ صلی اللہ علیہ وسلم نے ارشاد فرمایا: ”اگر مجھے یہ اندیشہ نہ ہوتا کہ یہ صدقہ کی ہے تو میں اسے ضرور کھا لیتا۔“ [مسند أبي يعلى الموصلي/مسند أنس بن مالك/حدیث: 3011]

سیدنا انس رضی اللہ عنہ سے روایت ہے کہ انہوں نے بیان فرمایا کہ ”رسول اللہ صلی اللہ علیہ وسلم کو لباس میں سب سے زیادہ یمنی دھاری دار چادر (حِبرہ) پسند تھی“۔ [مسند أبي يعلى الموصلي/مسند أنس بن مالك/حدیث: 3012]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”یقیناً کچھ اقوام کو ان گناہوں کی پاداش میں جو ان سے سرزد ہوئے ہوں گے، جہنم کی آگ کی تپش اور جھلسن پہنچے گی، پھر اللہ تعالیٰ اپنے فضل و رحمت کی بدولت انہیں جنت میں داخل فرما دے گا۔“ [مسند أبي يعلى الموصلي/مسند أنس بن مالك/حدیث: 3013]

سیدنا انس رضی اللہ عنہ سے روایت ہے کہ ”نبی کریم صلی اللہ علیہ وسلم نے کبھی بھی کسی اونچی میز (خوان) پر کھانا نہیں کھایا اور نہ ہی کبھی چھوٹی پیالیوں میں تناول فرمایا، اور نہ ہی آپ صلی اللہ علیہ وسلم کے لیے کبھی باریک و نفیس روٹی پکائی گئی“، قتادہ رحمہ اللہ بیان کرتے ہیں کہ میں نے سیدنا انس رضی اللہ عنہ سے پوچھا: ”پھر آپ لوگ کس چیز پر بیٹھ کر کھانا کھایا کرتے تھے؟“ تو انہوں نے جواب دیا: ”چمڑے کے دسترخوانوں پر“، ابو موسیٰ رحمہ اللہ فرماتے ہیں کہ یہاں یونس سے مراد یونس بن ابی الفرات الاسکاف ہیں۔ [مسند أبي يعلى الموصلي/مسند أنس بن مالك/حدیث: 3014]

سیدنا انس رضی اللہ عنہ سے روایت ہے کہ نبی اللہ صلی اللہ علیہ وسلم نے شراب نوشی پر کھجور کی شاخوں اور جوتوں سے مارا، پھر سیدنا ابوبکر رضی اللہ عنہ نے چالیس کوڑے لگائے۔ جب سیدنا عمر رضی اللہ عنہ کا زمانہ آیا اور لوگ دیہات اور آبادیوں کے قریب جا بسے تو انہوں نے پوچھا: ”شراب نوشی کی سزا کے بارے میں تمہاری کیا رائے ہے؟“ سیدنا عبدالرحمن بن عوف رضی اللہ عنہ نے کہا: ”میری رائے ہے کہ اسے حدود میں سب سے ہلکی حد کے برابر کر دیں۔“ چنانچہ سیدنا عمر رضی اللہ عنہ نے اسی کوڑے لگائے۔ [مسند أبي يعلى الموصلي/مسند أنس بن مالك/حدیث: 3015]