سیدنا انس رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”سجدے میں اعتدال اور میانہ روی اختیار کرو اور تم میں سے کوئی بھی اپنے بازوؤں کو کتے کی طرح زمین پر نہ بچھائے۔“ [مسند أبي يعلى الموصلي/مسند أنس بن مالك/حدیث: 2986]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم کسی دعا میں اپنے ہاتھ نہیں اٹھاتے تھے، سوائے استسقاء کے؛ اس میں آپ صلی اللہ علیہ وسلم ہاتھ اس قدر بلند کرتے کہ آپ کی بغلوں کی سفیدی نظر آتی تھی۔ البتہ عبد الاعلیٰ رحمہ اللہ نے روایت میں کہا: ”یہاں تک کہ آپ صلی اللہ علیہ وسلم کی دونوں بغلوں کی سفیدی، یا آپ صلی اللہ علیہ وسلم کی ایک بغل کی سفیدی نظر آتی تھی۔“ [مسند أبي يعلى الموصلي/مسند أنس بن مالك/حدیث: 2987]

سیدنا انس بن مالک رضی اللہ عنہ سے مروی ہے کہ انہوں نے نبی کریم صلی اللہ علیہ وسلم سے اسی کے مثل (یعنی سابقہ حدیث کے ہم معنی) روایت بیان فرمائی ہے۔ [مسند أبي يعلى الموصلي/مسند أنس بن مالك/حدیث: 2988]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ” «إِنِّي لَأَتُوبُ فِي الْيَوْمِ سَبْعِينَ مَرَّةً» بے شک میں دن میں ستر مرتبہ توبہ کرتا ہوں۔“ [مسند أبي يعلى الموصلي/مسند أنس بن مالك/حدیث: 2989]

سیدنا انس رضی اللہ عنہ سے روایت ہے کہ جب رسول اللہ صلی اللہ علیہ وسلم کی وفات کا وقت قریب آیا تو آپ صلی اللہ علیہ وسلم کی عمومی وصیت یہی تھی کہ ”نماز کا اہتمام کرنا اور اپنے زیرِ دستوں (غلاموں اور لونڈیوں) کے حقوق کا خیال رکھنا“، یہاں تک کہ جاں کنی کے عالم میں ان کلمات کی آواز آپ صلی اللہ علیہ وسلم کے سینہ مبارک میں گونجنے لگی اور زبانِ مبارک سے ان کا واضح طور پر اظہار نہ ہو سکا۔ [مسند أبي يعلى الموصلي/مسند أنس بن مالك/حدیث: 2990]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”یقیناً جنت میں ایک ایسا درخت ہے کہ سوار اس کے سائے میں ایک ہزار سال چلتا رہے، پھر بھی اسے طے نہیں کر سکے گا۔“ راوی نے وضاحت کی کہ ابو یعلیٰ کی کتاب میں ”ایک ہزار سال“ کے الفاظ تھے۔ [مسند أبي يعلى الموصلي/مسند أنس بن مالك/حدیث: 2991]

سیدنا انس رضی اللہ عنہ سے روایت ہے، انہوں نے فرمایا کہ ”میں نے رسول اللہ صلی اللہ علیہ وسلم کی دس برس تک خدمت کی، (اس طویل عرصے میں) آپ صلی اللہ علیہ وسلم نے کبھی کسی ایسے کام پر جو میں نے کر دیا ہو یہ نہیں فرمایا کہ تم نے یہ کیوں کیا؟ اور نہ ہی کسی ایسے کام کے متعلق جو میں نے نہ کیا ہو کبھی یہ فرمایا کہ تم نے اسے کیوں نہیں کیا؟“ [مسند أبي يعلى الموصلي/مسند أنس بن مالك/حدیث: 2992]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”وہ شخص جہنم سے نکال لیا جائے گا جس نے «لَا إِلَهَ إِلَّا اللَّهُ» ”اللہ کے سوا کوئی معبودِ برحق نہیں“ کہا ہو اور اس کے دل میں ایک جو کے وزن کے برابر بھی خیر (ایمان) ہو، اور وہ شخص بھی جہنم سے نکال لیا جائے گا جس نے «لَا إِلَهَ إِلَّا اللَّهُ» کہا ہو اور اس کے دل میں گندم کے ایک دانے کے وزن کے برابر بھی خیر ہو، اور وہ شخص بھی جہنم سے نکال لیا جائے گا جس نے «لَا إِلَهَ إِلَّا اللَّهُ» کہا ہو اور اس کے دل میں ایک ذرہ برابر بھی خیر موجود ہو۔“ راوی کہتے ہیں کہ سعید رحمہ اللہ سے پوچھا گیا: اے ابو النضر! کیا وہ دوزخ میں داخل کیے جانے کے بعد اس سے نکالے جائیں گے؟ تو انہوں نے جواب دیا: ”کیا تم لوگ عرب نہیں ہو؟ کیا نکلنا داخل ہوئے بغیر ممکن ہے؟“ (یعنی خروج تو دخول ہی کے بعد ہوتا ہے)۔ [مسند أبي يعلى الموصلي/مسند أنس بن مالك/حدیث: 2993]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”انصار میرے جگری اور میرے خاص رازدار ہیں، یقیناً لوگ تو بڑھتے رہیں گے جبکہ یہ (انصار) تعداد میں کم ہوتے جائیں گے، لہٰذا ان کے نیکو کاروں کی نیکی کو قبول کرنا اور ان کے خطا کاروں سے درگزر کرنا۔“ [مسند أبي يعلى الموصلي/مسند أنس بن مالك/حدیث: 2994]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے سیدنا ابی بن کعب رضی اللہ عنہ سے ارشاد فرمایا: ”بے شک اللہ تعالیٰ نے مجھے حکم دیا ہے کہ میں تمہیں سورہ ﴿لَمْ يَكُنِ الَّذِينَ كَفَرُوا﴾ پڑھ کر سناؤں۔“ انہوں نے عرض کیا: کیا اللہ تعالیٰ نے میرا نام لے کر ذکر فرمایا ہے؟ آپ صلی اللہ علیہ وسلم نے ارشاد فرمایا: ”جی ہاں۔“ یہ سن کر سیدنا ابی بن کعب رضی اللہ عنہ (فرطِ جذبات سے) رو پڑے۔ [مسند أبي يعلى الموصلي/مسند أنس بن مالك/حدیث: 2995]