سیدہ عائشہ رضی اللہ عنہا سے روایت ہے کہ انہوں نے بیان فرمایا کہ ”رسول اللہ صلی اللہ علیہ وسلم نے رشوت دینے والے اور رشوت لینے والے پر لعنت فرمائی ہے۔“ [مسند أبي يعلى الموصلي/مسند عائشة/حدیث: 4947]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس نے مغرب اور عشاء کے درمیانی وقت میں بیس رکعات (نفل) ادا کیں، اللہ تعالیٰ اس کے لیے جنت میں ایک گھر تعمیر فرما دے گا۔“ [مسند أبي يعلى الموصلي/مسند عائشة/حدیث: 4948]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے ارشاد فرمایا: ”سخت گرمی کی شدت میں ظہر کی نماز کو ٹھنڈا کر کے (یعنی تپش کم ہونے پر) ادا کیا کرو۔“ ان شاء اللہ، عبد الأعلى بن حماد رحمہ اللہ نے ہمیں اسی طرح یہ الفاظ املا کرائے تھے۔ [مسند أبي يعلى الموصلي/مسند عائشة/حدیث: 4949]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس شخص کو یہ بات خوشی دے کہ وہ (اجر و ثواب میں) انتھک محنت کرنے والے اور ہمہ وقت عبادت میں جتے رہنے والے شخص سے سبقت لے جائے، تو اسے چاہیے کہ وہ خود کو گناہوں سے باز رکھے۔“ [مسند أبي يعلى الموصلي/مسند عائشة/حدیث: 4950]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم (پانی کا) برتن بلی کے لیے جھکا دیا کرتے تھے تاکہ وہ اس میں سے پی لے، پھر آپ صلی اللہ علیہ وسلم (اسی سے) نماز کے لیے وضو فرما لیتے تھے۔“ [مسند أبي يعلى الموصلي/مسند عائشة/حدیث: 4951]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: «لَا هِجْرَةَ بَعْدَ الْفَتْحِ وَلَكِنْ جِهَادٌ وَنِيَّةٌ، وَإِذَا اسْتُنْفِرْتُمْ فَانْفِرُوا» ”فتحِ مکہ کے بعد اب (وہ مخصوص اور لازمی) ہجرت باقی نہیں رہی، البتہ جہاد اور نیتِ خیر کا حکم اب بھی برقرار ہے، اور جب کبھی تمہیں جہاد کے لیے پکارا جائے تو فوراً نکل کھڑے ہوا کرو۔“ [مسند أبي يعلى الموصلي/مسند عائشة/حدیث: 4952]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: «أَقِيلُوا ذَوِي الْهَيْئَاتِ زَلَّاتِهِمْ» ”صاحبِ مروت اور معزز لوگوں کی لغزشوں سے درگزر کیا کرو۔“ عمرہ رحمہا اللہ سے یہ روایت نقل کرنے والے راوی (ابوبکر بن نافع رحمہ اللہ) بیان کرتے ہیں کہ میں ابوبکر بن عمرو بن حزم رحمہ اللہ کی مجلس میں حاضر ہوا تو انہوں نے اسی حدیث کے مطابق (عدالتی) فیصلہ صادر فرمایا تھا۔ [مسند أبي يعلى الموصلي/مسند عائشة/حدیث: 4953]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم (گھر میں) تشریف لائے اور دریافت فرمایا: ”اے عائشہ! کیا روٹی کا کوئی ٹکڑا موجود ہے؟“ میں آپ صلی اللہ علیہ وسلم کے پاس ایک ٹکیہ (روٹی) لے کر حاضر ہوئی تو آپ صلی اللہ علیہ وسلم نے اسے اپنے دہنِ مبارک پر رکھا اور فرمایا: ”اے عائشہ! کیا اس میں سے کوئی چیز میرے پیٹ میں داخل ہوئی ہے؟ اسی طرح روزہ دار کا بوسہ لینا ہے، درحقیقت روزہ اس چیز سے ٹوٹتا ہے جو (جسم کے) اندر داخل ہو، اس سے نہیں جو باہر نکلے۔“ [مسند أبي يعلى الموصلي/مسند عائشة/حدیث: 4954]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم میرے پاس تشریف لائے جبکہ میں رو رہی تھی، آپ صلی اللہ علیہ وسلم نے دریافت فرمایا: ”تمہیں کس بات نے رلایا ہے؟“ میں نے عرض کیا: فاطمہ نے مجھے برا بھلا کہا ہے، چنانچہ آپ صلی اللہ علیہ وسلم نے سیدہ فاطمہ رضی اللہ عنہا کو طلب فرمایا اور ان سے پوچھا: ”اے فاطمہ! کیا تم نے عائشہ کو برا بھلا کہا ہے؟“ انہوں نے عرض کیا: جی ہاں، اے اللہ کے رسول! آپ صلی اللہ علیہ وسلم نے فرمایا: ”اے فاطمہ! کیا تم اس سے محبت نہیں کرتیں جس سے میں محبت کرتا ہوں؟“ انہوں نے عرض کیا: کیوں نہیں (ضرور کرتی ہوں)، آپ صلی اللہ علیہ وسلم نے فرمایا: ”اور کیا تم اس سے بغض نہیں رکھتیں جس سے میں بغض رکھتا ہوں؟“ انہوں نے عرض کیا: جی بالکل، آپ صلی اللہ علیہ وسلم نے فرمایا: ”تو یقیناً میں عائشہ سے محبت کرتا ہوں، لہٰذا تم بھی اس سے محبت کرو۔“ اس پر سیدہ فاطمہ رضی اللہ عنہا نے کہا: ”میں (آئندہ) عائشہ کے متعلق کبھی کوئی ایسی بات نہیں کہوں گی جو انہیں اذیت پہنچائے۔“ [مسند أبي يعلى الموصلي/مسند عائشة/حدیث: 4955]

سیدہ عائشہ رضی اللہ عنہا سے روایت ہے کہ نبی اکرم صلی اللہ علیہ وسلم ”حلوا (مٹھائی) اور شہد کو پسند فرماتے تھے“۔ [مسند أبي يعلى الموصلي/مسند عائشة/حدیث: 4956]