سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم «يَذْكُرُ اللَّهَ فِي كُلِّ أَحْيَانِهِ» ”اپنے تمام اوقات اور ہر حال میں اللہ تعالیٰ کا ذکر فرمایا کرتے تھے“۔ [مسند أبي يعلى الموصلي/مسند عائشة/حدیث: 4937]

اسود رحمہ اللہ سے روایت ہے کہ انہوں نے بیان کیا کہ میں نے ام المؤمنین سیدہ عائشہ رضی اللہ عنہا سے زہریلے جانور کے ڈسنے پر دم کرنے کے متعلق دریافت کیا تو انہوں نے فرمایا کہ ”رسول اللہ صلی اللہ علیہ وسلم نے ہر زہریلے اور ڈسنے والے جانور کے زہر کا اثر زائل کرنے کے لیے دم کرنے کی رخصت و اجازت عطا فرمائی ہے۔“ [مسند أبي يعلى الموصلي/مسند عائشة/حدیث: 4938]

شریح رحمہ اللہ سے روایت ہے کہ سیدہ عائشہ رضی اللہ عنہا نے انہیں بتایا کہ جب وہ ایامِ حیض میں ہوتیں تو رسول اللہ صلی اللہ علیہ وسلم ان سے فرماتے: ”اے ابوبکر کی بیٹی! اپنی کمر پر (تہبند) مضبوطی سے باندھ لو۔“ اور آپ صلی اللہ علیہ وسلم رات کے وقت ان کے ساتھ جس قدر اللہ چاہتا (بغیر ہم بستری کے) مباشرت فرماتے تھے، نیز آپ صلی اللہ علیہ وسلم اپنی نماز کے لیے تکبیر کہتے تھے اور رات کو بہت کم سوتے تھے جب سے اللہ تعالیٰ نے یہ حکم فرمایا ہے: ﴿قُمِ اللَّيْلَ إِلَّا قَلِيلًا﴾ ”رات کو قیام کیا کرو مگر تھوڑا حصہ۔“ [مسند أبي يعلى الموصلي/مسند عائشة/حدیث: 4939]

سیدہ عائشہ رضی اللہ عنہا سے روایت ہے کہ انہوں نے فرمایا: ”دو نمازیں ایسی ہیں جنہیں رسول اللہ صلی اللہ علیہ وسلم نے کبھی ترک نہیں فرمایا، خواہ پوشیدہ طور پر ہو یا اعلانیہ: فجر (کی فرض نماز) سے پہلے کی دو رکعتیں اور عصر (کی نماز) کے بعد کی دو رکعتیں۔“ [مسند أبي يعلى الموصلي/مسند عائشة/حدیث: 4940]

مجاہد رحمہ اللہ سے روایت ہے کہ سیدنا سائب رضی اللہ عنہ نے سیدہ عائشہ رضی اللہ عنہا سے دریافت کیا کہ ”میں بوڑھا ہو چکا ہوں اور اب میں بیٹھ کر ہی نماز پڑھنے کی سکت رکھتا ہوں، تو اس بارے میں آپ کی کیا رائے ہے؟“ انہوں نے جواب دیا کہ میں نے رسول اللہ صلی اللہ علیہ وسلم کو فرماتے ہوئے سنا - یا (راوی کو شک ہے کہ انہوں نے کہا) رسول اللہ صلی اللہ علیہ وسلم نے ارشاد فرمایا: «صَلَاةُ الْجَالِسِ عَلَى النِّصْفِ مِنْ صَلَاتِهِ قَائِمًا» ”بیٹھ کر نماز پڑھنے والے کا اجر، کھڑے ہو کر نماز پڑھنے والے کی نماز کے مقابلے میں آدھا ہے۔“ [مسند أبي يعلى الموصلي/مسند عائشة/حدیث: 4941]

سیدہ عائشہ رضی اللہ عنہا سے روایت ہے کہ انہوں نے فرمایا: ”میں رسول اللہ صلی اللہ علیہ وسلم کے ہدی (قربانی کے جانوروں) کے قلائد (گلوبند) تیار کرتی تھی، پھر آپ صلی اللہ علیہ وسلم انہیں روانہ فرما دیتے تھے اور اس کے بعد بھی آپ صلی اللہ علیہ وسلم کسی ایسی چیز سے اجتناب نہیں فرماتے تھے جس سے ایک محرم (حالتِ احرام میں) پرہیز کرتا ہے۔“ [مسند أبي يعلى الموصلي/مسند عائشة/حدیث: 4942]

سیدہ عائشہ رضی اللہ عنہا سے مروی ہے، ابو بردہ رحمہ اللہ بیان کرتے ہیں کہ ”ہم سیدہ عائشہ رضی اللہ عنہا کی خدمت میں حاضر ہوئے تو انہوں نے ہمیں یمن کا بنا ہوا ایک غلیظ (موٹا) تہبند اور ایک ایسی کملی دکھائی جسے تم 'ملبدہ' (یعنی پیوند لگی ہوئی یا دبیز چادر) کہتے ہو، پھر سیدہ رضی اللہ عنہا نے فرمایا: ”رسول اللہ صلی اللہ علیہ وسلم کی روحِ مبارک انہی دو لباسوں میں قبض کی گئی تھی۔““ [مسند أبي يعلى الموصلي/مسند عائشة/حدیث: 4943]

ہمیں ہدبہ رحمہ اللہ نے حدیث بیان کی، انہوں نے کہا کہ ہمیں سلیمان بن مغیرہ رحمہ اللہ نے اپنی اسی سابقہ سند کے ساتھ اسی کے مانند روایت بیان کی ہے۔ [مسند أبي يعلى الموصلي/مسند عائشة/حدیث: 4944]

عکرمہ رحمہ اللہ بیان کرتے ہیں کہ میں نے سیدہ عائشہ رضی اللہ عنہا سے دریافت کیا کہ کیا رسول اللہ صلی اللہ علیہ وسلم کبھی (اپنی گفتگو میں) بطورِ تمثیل کوئی شعر پڑھا کرتے تھے؟ انہوں نے جواب دیا: ”ہاں، آپ صلی اللہ علیہ وسلم بسا اوقات جب اپنے گھر میں تشریف لاتے تو (بطورِ تمثیل) یہ مصرع پڑھا کرتے تھے: «وَيَأْتِيكَ بِالْأَخْبَارِ مَنْ لَمْ تُزَوِّدِ» ”اور تیرے پاس خبریں وہ شخص لے کر آئے گا جسے تو نے کوئی زادِ راہ (یا معاوضہ) نہیں دیا تھا۔““ [مسند أبي يعلى الموصلي/مسند عائشة/حدیث: 4945]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم کی موجودگی میں ایک شخص کو چھینک آئی تو اس نے عرض کیا: ”اے اللہ کے رسول! میں (جواباً) کیا کہوں؟“ آپ صلی اللہ علیہ وسلم نے فرمایا: ”تم «الْحَمْدُ لِلَّهِ» ”تمام تعریفیں اللہ ہی کے لیے ہیں“ کہو۔“ پھر لوگوں نے عرض کیا: ”اے اللہ کے رسول! ہم اس کے جواب میں کیا کہیں؟“ آپ صلی اللہ علیہ وسلم نے فرمایا: ”تم کہو: «يَرْحَمُكَ اللَّهُ» ”اللہ تم پر رحم فرمائے“۔“ اس شخص نے پھر دریافت کیا: ”اے اللہ کے رسول! میں انہیں پلٹ کر کیا جواب دوں؟“ آپ صلی اللہ علیہ وسلم نے ارشاد فرمایا: ”تم کہو: «يَهْدِيكُمُ اللَّهُ وَيُصْلِحُ بَالُكُمْ» ”اللہ تمہیں ہدایت دے اور تمہارے حالات درست فرما دے“۔“ [مسند أبي يعلى الموصلي/مسند عائشة/حدیث: 4946]