سیدنا ابن عمر رضی اللہ عنہما سے روایت ہے کہ ”رسول اللہ صلی اللہ علیہ وسلم نے گھریلو گدھوں کا گوشت کھانے سے منع فرمایا۔“ [مسند أبي يعلى الموصلي/مسند عبد الله بن عمر/حدیث: 5465]

سالم رحمہ اللہ اپنے والد سیدنا عبد اللہ بن عمر رضی اللہ عنہما سے روایت کرتے ہیں کہ رسول اللہ صلی اللہ علیہ وسلم نے ارشاد فرمایا: ”ہر نشہ آور چیز حرام ہے۔“ [مسند أبي يعلى الموصلي/مسند عبد الله بن عمر/حدیث: 5466]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”ہر نشہ آور چیز شراب ہے، اور ہر نشہ آور چیز حرام ہے، اس کی قلیل اور کثیر مقدار (حکمِ حرمت میں) برابر ہے۔“ [مسند أبي يعلى الموصلي/مسند عبد الله بن عمر/حدیث: 5467]

سیدنا عبداللہ بن عمر رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ ارشاد فرماتے ہوئے سنا: ”جو شخص کسی غلام کو فروخت کرے تو اس کا مال اسی کا ہوگا جس نے اسے فروخت کیا ہے الا یہ کہ خریدار (بیع میں اس مال کی شمولیت کی) شرط لگا دے، اور جس نے کھجور کے ایسے درخت فروخت کیے جن کی تلقیح (گابھا لگانا) ہو چکی ہو تو ان کا پھل بھی اسی فروخت کرنے والے کا حق ہوگا سوائے اس صورت کے کہ خریدار (اپنے لیے پھل کی) شرط رکھ لے۔“ [مسند أبي يعلى الموصلي/مسند عبد الله بن عمر/حدیث: 5468]

سالم بن عبداللہ رحمہ اللہ سے روایت ہے کہ سیدنا عبداللہ بن عمر رضی اللہ عنہ نے فرمایا کہ میں نے رسول اللہ صلی اللہ علیہ وسلم کو یہ ارشاد فرماتے ہوئے سنا: ”میں سو رہا تھا کہ (خواب میں) میں نے خود کو کعبہ کا طواف کرتے ہوئے دیکھا، اچانک میری نظر ایک شخص پر پڑی جن کے بال سیدھے اور ہموار تھے اور وہ دو آدمیوں کے درمیان (ان کا سہارا لیے ہوئے) تھے، ان کے سر سے پانی کے قطرے ٹپک رہے تھے - یا (آپ صلی اللہ علیہ وسلم نے فرمایا کہ) پانی بہہ رہا تھا - میں نے دریافت کیا کہ یہ کون ہیں؟ تو بتایا گیا کہ یہ ابنِ مریم (عیسیٰ علیہ السلام) ہیں۔ پھر میں دوسری طرف متوجہ ہوا تو اچانک ایک سرخ رنگ کا جسیم شخص نظر آیا جس کے بال انتہائی گھنگھریالے تھے اور وہ ایک آنکھ سے کانا تھا، اس کی آنکھ ایسی معلوم ہوتی تھی گویا وہ ابھرا ہوا انگور ہو۔ میں نے پوچھا کہ یہ کون ہے؟ تو بتایا گیا کہ یہ دجال ہے، اور لوگوں میں ابنِ قطن اس کے ساتھ سب سے زیادہ مشابہت رکھنے والا شخص ہے“۔ [مسند أبي يعلى الموصلي/مسند عبد الله بن عمر/حدیث: 5469]

سیدنا عبداللہ بن عمر رضی اللہ عنہما سے روایت ہے کہ ”رسول اللہ صلی اللہ علیہ وسلم نے زکوٰۃ کے احکام کے متعلق ایک تحریر لکھوائی اور اسے اپنی تلوار کے ساتھ رکھا، آپ صلی اللہ علیہ وسلم نے اپنی وفات تک اسے اپنے عاملین کی طرف روانہ نہیں فرمایا تھا، پھر آپ صلی اللہ علیہ وسلم کی وفات کے بعد سیدنا ابوبکر صدیق رضی اللہ عنہ نے اس پر عمل کیا اور ان کے بعد سیدنا عمر فاروق رضی اللہ عنہ نے بھی اسی کے مطابق عمل کیا، اس تحریر میں یہ درج تھا کہ: ”پانچ اونٹوں میں ایک بکری واجب ہے، دس میں دو بکریاں، پندرہ میں تین بکریاں اور بیس اونٹوں میں چار بکریاں واجب ہیں۔ پھر پچیس سے پینتیس اونٹوں تک ایک 'بنتِ مخاض' (ایک سالہ اونٹنی) ہے، اگر تعداد اس سے بڑھ جائے تو پینتالیس تک 'بنتِ لبون' (دو سالہ اونٹنی) ہے، اگر اس سے بڑھ جائے تو ساٹھ تک ایک 'حقہ' (تین سالہ اونٹنی) ہے، اگر اس سے بڑھ جائے تو پچھتر تک ایک 'جذعہ' (چار سالہ اونٹنی) ہے، اگر اس سے بڑھ جائے تو نوے تک دو 'بنتِ لبون' ہیں، اور اگر ایک سو بیس تک پہنچ جائیں تو دو 'حقہ' ہیں، پھر اگر تعداد ایک سو بیس سے تجاوز کر جائے تو ہر پچاس میں ایک 'حقہ' اور ہر چالیس میں ایک 'بنتِ لبون' واجب ہوگی۔ اور بکریوں کی زکوٰۃ کا حکم یہ تھا کہ: ہر چالیس بکریوں میں ایک بکری ہے ایک سو بیس تک، اگر اس سے زائد ہوں تو دو سو تک دو بکریاں ہیں، اگر اس سے بھی زائد ہوں تو تین سو تک تین بکریاں ہیں، پھر اگر تین سو سے بڑھ جائیں تو ہر سو بکریوں میں ایک بکری واجب ہے، اور جب تک اگلا سو مکمل نہ ہو جائے اس میں مزید کچھ واجب نہیں۔ نیز زکوٰۃ کے ڈر سے اکٹھے مال کو الگ الگ نہ کیا جائے اور نہ ہی الگ الگ مال کو اکٹھا کیا جائے، اور جو مال دو شریکوں کا ملا جلا ہو وہ آپس میں برابر کے حساب سے ایک دوسرے سے رجوع کر لیں۔ اور زکوٰۃ میں نہ تو نہایت بوڑھا جانور لیا جائے اور نہ ہی عیب دار۔“ سفیان رحمہ اللہ کہتے ہیں کہ زہری رحمہ اللہ نے (اس روایت میں) گائے کا ذکر نہیں کیا۔ زہری رحمہ اللہ نے فرمایا: ”جب زکوٰۃ وصول کرنے والا آئے تو وہ مال کے تین حصے کرے: ایک تہائی اعلیٰ، ایک تہائی ادنیٰ اور ایک تہائی درمیانہ، پھر وہ درمیانے درجے کے مال میں سے زکوٰۃ لے۔“ [مسند أبي يعلى الموصلي/مسند عبد الله بن عمر/حدیث: 5470]

ہمیں ابو خیثمہ رحمہ اللہ نے حدیث بیان کی، ان سے عباد بن عوام رحمہ اللہ نے اپنی اسی سابقہ سند کے ساتھ اسی کے مثل روایت بیان کی ہے۔ [مسند أبي يعلى الموصلي/مسند عبد الله بن عمر/حدیث: 5471]

سیدنا ابن عمر رضی اللہ عنہما سے روایت ہے کہ ”نبی کریم صلی اللہ علیہ وسلم کی وہ مخصوص قسم جس پر آپ صلی اللہ علیہ وسلم اکثر حلف اٹھایا کرتے تھے، وہ یہ تھی: «لَا وَمُقَلِّبِ الْقُلُوبِ» ”نہیں، دلوں کو پھیرنے والے کی قسم۔““ [مسند أبي يعلى الموصلي/مسند عبد الله بن عمر/حدیث: 5472]

سیدنا عبداللہ بن عمر رضی اللہ عنہما سے روایت ہے کہ انہوں نے فرمایا: ”میں نے رسول اللہ صلی اللہ علیہ وسلم کو (بیت اللہ کے) صرف دو یمانی کونوں کے علاوہ کسی اور مقام کا استلام کرتے ہوئے نہیں دیکھا۔“ [مسند أبي يعلى الموصلي/مسند عبد الله بن عمر/حدیث: 5473]

سیدنا عبداللہ بن عمر رضی اللہ عنہما سے روایت ہے کہ ”وہ جب بھی مقامِ ذوالحلیفہ سے گزرتے تو وہاں رات بسر فرماتے یہاں تک کہ صبح ہو جاتی، اور وہ یہ خبر دیا کرتے تھے کہ رسول اللہ صلی اللہ علیہ وسلم بھی اسی طرح (یعنی وہاں قیام) فرمایا کرتے تھے۔“ [مسند أبي يعلى الموصلي/مسند عبد الله بن عمر/حدیث: 5474]