سیدنا ابوہریرہ رضی اللہ عنہ سے روایت ہے کہ انہوں نے فرمایا: ”جب بنو ابی العاص کی تعداد تیس تک پہنچ جائے گی تو اللہ کے دین میں بگاڑ و فساد پیدا کر دیا جائے گا، اللہ کے مال کو (اپنے درمیان) گردش کرنے والی دولت (یعنی ذاتی جاگیر) بنا لیا جائے گا اور اللہ کے بندوں کو غلام بنا لیا جائے گا۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6523]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم مسجد کی تعمیر فرما رہے تھے، پس جب عام لوگ ایک پتھر اٹھاتے تو سیدنا عمار رضی اللہ عنہ دو پتھر اٹھاتے تھے، اور جب لوگ ایک اینٹ منتقل کرتے تو وہ دو اینٹیں منتقل کرتے تھے، اس پر رسول اللہ صلی اللہ علیہ وسلم نے ارشاد فرمایا: «وَيْحَ ابْنِ سُمَيَّةَ تَقْتُلُهُ الْفِئَةُ الْبَاغِيَةُ» ”افسوس ابنِ سمیہ پر! انہیں ایک باغی گروہ شہید کرے گا۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6524]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میری اس مسجد میں ایک نماز ادا کرنا دیگر تمام مساجد میں ہزار نمازیں پڑھنے سے زیادہ فضیلت رکھتا ہے، سوائے مسجدِ حرام کے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6525]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”دنیا مومن کے لیے قید خانہ ہے اور کافر کے لیے جنت ہے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6526]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جو شخص مجھ پر ایک مرتبہ درود بھیجے گا، اس کے لیے اس کے بدلے دس نیکیاں لکھ دی جائیں گی۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6527]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم سے غیبت کے بارے میں دریافت کیا گیا تو آپ صلی اللہ علیہ وسلم نے ارشاد فرمایا: ”تمہارا اپنے بھائی کے متعلق ایسی بات کہنا جو اسے ناگوار گزرے (غیبت ہے)، اگرچہ تم اپنی کہی ہوئی بات میں سچے ہی ہو تب بھی تم نے اس کی غیبت کی ہے، اور اگر تم (اس کی طرف منسوب کرنے میں) جھوٹے ہو تو پھر تم نے اس پر بہتان باندھا ہے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6528]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”تم میں سے کوئی شخص (اپنے ماتحتوں کے لیے) ہرگز ’میرا بندہ‘ یا ’میری بندی‘ کے الفاظ استعمال نہ کرے، کیونکہ تم سب کے سب اللہ ہی کے بندے ہو اور تمہاری تمام عورتیں اللہ ہی کی بندیاں ہیں، بلکہ اسے چاہیے کہ یوں کہے: «فَتَايَ» ”میرا نوجوان“، «غُلَامِي» ”میرا خادم“ اور «جَارِيَتِي» ”میری خادمہ“۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6529]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس نے مجھے (خواب میں) دیکھا، اس نے یقیناً مجھے ہی دیکھا ہے، کیونکہ شیطان میری صورت اختیار نہیں کر سکتا۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6530]

سیدنا ابوہریرہ رضی اللہ عنہ سے روایت ہے: ”ام القرآن ان سبع مثانی میں سے ہے جو مجھے عطا کی گئی ہیں۔“ راوی کہتے ہیں: غالباً اس سے مراد نبی کریم صلی اللہ علیہ وسلم کا فرمان ہے۔ [مسند أبي يعلى الموصلي/تابع مسند أبي هريرة رضي الله عنه/حدیث: 6531]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم سے غیبت کے متعلق دریافت کیا گیا تو آپ صلی اللہ علیہ وسلم نے ارشاد فرمایا: ”تمہارا اپنے بھائی کا ذکر اس انداز میں کرنا جو اسے ناپسند ہو“، سائل نے عرض کیا: اے اللہ کے رسول صلی اللہ علیہ وسلم ! آپ کا کیا خیال ہے اگر میرے بھائی میں وہ عیب موجود ہو جو میں بیان کر رہا ہوں؟ آپ صلی اللہ علیہ وسلم نے ارشاد فرمایا: ”اگر اس میں وہ بات موجود ہو جو تم کہہ رہے ہو تو یقیناً تم نے اس کی غیبت کی، اور اگر وہ اس میں موجود نہ ہو تو پھر تم نے اس پر بہتان لگایا“۔ [مسند أبي يعلى الموصلي/تابع مسند أبي هريرة رضي الله عنه/حدیث: 6532]