سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”تم لوگ قیامت کے روز حق داروں کو ان کے حقوق ضرور بالضرور ادا کرو گے، یہاں تک کہ بے سینگ والی بکری کا بدلہ سینگ والی بکری سے لیا جائے گا۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6513]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا: ”کوئی مسلمان اپنے کسی مسلمان بھائی کے سودے پر سودا نہ کرے اور نہ ہی اس کے (پہلے سے بھیجے گئے) نکاح کے پیغام پر اپنا پیغامِ نکاح بھیجے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6514]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”نیک اعمال کی طرف اس وقت سے پہلے سبقت کرو جب اندھیری رات کے پردوں جیسے (پے در پے) فتنے نمودار ہوں گے؛ (ان فتنوں کی ہولناکی کا یہ عالم ہوگا کہ) آدمی صبح کے وقت مومن ہوگا اور شام تک کافر ہو جائے گا، اور شام کو مومن ہوگا تو صبح تک کفر کی حالت میں پہنچ جائے گا، وہ دنیا کے تھوڑے سے ساز و سامان کے بدلے اپنا دین بیچ ڈالے گا“۔ [مسند أبي يعلى الموصلي/تابع مسند أبي هريرة رضي الله عنه/حدیث: 6515]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”چھ بڑی علامتوں کے ظہور سے پہلے پہلے نیک اعمال کی بجا آوری میں جلدی کرو: سورج کا اپنے مغرب سے طلوع ہونا، دجال کا نکلنا، دھوئیں کا نمودار ہونا، زمین کے جانور (دابۃ الارض) کا ظاہر ہونا، تم میں سے کسی کی اپنی موت کا انفرادی معاملہ یا پھر تمام لوگوں کے لیے پیش آنے والا قیامت کا عمومی فتنہ۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6516]

سیدنا ابوہریرہ رضی اللہ عنہ سے روایت ہے کہ ”قیامت اس وقت تک برپا نہیں ہوگی جب تک کہ سورج اپنے مقامِ مغرب سے طلوع نہ ہو جائے، پھر جب سورج مغرب سے طلوع ہو جائے گا تو روئے زمین کے تمام لوگ ایمان لے آئیں گے، مگر اس دن ﴿کسی ایسے شخص کو اس کا ایمان نفع نہ دے گا جو اس سے پہلے ایمان نہ لایا ہو یا اس نے اپنے ایمان کی حالت میں کوئی بھلائی (نیک عمل) نہ کمائی ہو﴾ ۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6517]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”آپس میں گالی گلوچ کرنے والے دو اشخاص جو کچھ بھی (ایک دوسرے کے خلاف) کہیں، اس کا سارا وبال پہل کرنے والے پر ہے، بشرطیکہ مظلوم (جواب دیتے ہوئے) حد سے تجاوز نہ کرے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6518]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”گھنٹی شیطان کے باجوں میں سے ہے“۔ [مسند أبي يعلى الموصلي/تابع مسند أبي هريرة رضي الله عنه/حدیث: 6519]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم غلے کے ایک ڈھیر کے پاس سے گزرے، آپ صلی اللہ علیہ وسلم نے اپنا دستِ مبارک اس کے اندر داخل کیا تو آپ صلی اللہ علیہ وسلم کی مبارک انگلیوں کو تری محسوس ہوئی، آپ صلی اللہ علیہ وسلم نے دریافت فرمایا: ”اے غلے کے مالک! یہ کیا ہے؟“ اس نے عرض کی: اے اللہ کے رسول صلی اللہ علیہ وسلم ! اس پر بارش کا پانی پڑ گیا تھا، آپ صلی اللہ علیہ وسلم نے ارشاد فرمایا: ”پھر تم نے اس (بھیگے ہوئے حصے) کو غلے کے اوپر کیوں نہ رکھا تاکہ لوگ اسے دیکھ لیتے؟ جس نے مجھے دھوکا دیا وہ مجھ سے (میرے طریقے پر) نہیں ہے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6520]

سیدنا ابوہریرہ رضی اللہ عنہ سے روایت ہے کہ ایک شخص نے عرض کیا کہ اے اللہ کے رسول صلی اللہ علیہ وسلم ! نرخ مقرر فرما دیجیے، تو آپ صلی اللہ علیہ وسلم نے ارشاد فرمایا: ”درحقیقت اللہ ہی (قیمتوں کو) بلند اور پست کرتا ہے، اور میں یقیناً یہ امید رکھتا ہوں کہ جب میں اللہ تعالیٰ سے ملاقات کروں تو کسی بھی شخص کا میرے ذمہ کوئی جانی یا مالی مطالبہ نہ ہو“، پھر ایک اور شخص نے آپ صلی اللہ علیہ وسلم سے عرض کیا کہ قیمتیں مقرر فرما دیں، تو آپ صلی اللہ علیہ وسلم نے فرمایا: ”(میں اس کے لیے) اللہ عزوجل سے دعا کروں گا“۔ [مسند أبي يعلى الموصلي/تابع مسند أبي هريرة رضي الله عنه/حدیث: 6521]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس شخص نے کوئی ایسی نماز ادا کی جس میں ام القرآن (سورہ فاتحہ) کی تلاوت نہ کی تو وہ نماز ناقص ہے، وہ ناقص ہے، وہ ناقص ہے، یعنی غیر مکمل ہے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6522]