سیدنا عباس بن عبدالمطلب رضی اللہ عنہ سے الاحنف بن قیس رحمہ اللہ کی روایت ہے کہ انہوں نے اللہ تعالیٰ کے اس فرمانِ عالی شان ﴿وَيَحْمِلُ عَرْشَ رَبِّكَ فَوْقَهُمْ يَوْمَئِذٍ ثَمَانِيَةٌ﴾ ”اور اس روز تمہارے رب کے عرش کو ان کے اوپر آٹھ فرشتے اٹھائے ہوئے ہوں گے“ کی تفسیر میں فرمایا کہ ”اس سے مراد وہ آٹھ فرشتے ہیں جو پہاڑی بکروں کی صورت میں ہوں گے۔“ [مسند أبي يعلى الموصلي/مسند العباس بن عبد المطلب رضي الله عنه/حدیث: 6712]

سیدنا عباس بن عبد المطلب رضی اللہ عنہ سے روایت ہے کہ ہم بطحاء کے مقام پر رسول اللہ صلی اللہ علیہ وسلم کے ساتھ بیٹھے ہوئے تھے کہ رسول اللہ صلی اللہ علیہ وسلم نے دریافت فرمایا: ”کیا تم جانتے ہو کہ یہ کیا ہے؟“ ہم نے عرض کیا: یہ بادل (سحاب) ہیں، آپ صلی اللہ علیہ وسلم نے فرمایا: ”اور مُزن بھی؟“ ہم نے عرض کیا: اور مُزن بھی، آپ صلی اللہ علیہ وسلم نے فرمایا: ”اور عنان بھی؟“ راوی کہتے ہیں کہ پھر ہم خاموش ہو گئے تو آپ صلی اللہ علیہ وسلم نے دریافت فرمایا: ”کیا تم جانتے ہو کہ آسمان اور زمین کے درمیان کتنا فاصلہ ہے؟“ ہم نے عرض کیا: اللہ اور اس کا رسول صلی اللہ علیہ وسلم ہی بہتر جانتے ہیں، آپ صلی اللہ علیہ وسلم نے ارشاد فرمایا: ”ان دونوں کے درمیان پانچ سو سال کی مسافت کا فاصلہ ہے، اور ہر ایک آسمان سے دوسرے آسمان تک پانچ سو سال کی مسافت کا فاصلہ ہے، اور ہر آسمان کی ضخامت پانچ سو سال کی مسافت ہے، اور ساتویں آسمان کے نچلے اور بالائی حصے کے درمیان بھی اتنا ہی فاصلہ ہے جتنا کہ آسمان اور زمین کے درمیان ہے، پھر اس کے اوپر آٹھ پہاڑی بکروں کی صورت والے (فرشتے) ہیں جن کے گھٹنوں اور کھروں کے درمیان اتنا فاصلہ ہے جتنا آسمان اور زمین کے درمیان ہے، پھر اس کے اوپر عرش ہے، اور اللہ تعالیٰ پر بنی آدم کے اعمال میں سے کچھ بھی پوشیدہ نہیں ہے۔“ [مسند أبي يعلى الموصلي/مسند العباس بن عبد المطلب رضي الله عنه/حدیث: 6713]

سیدنا عباس بن عبد المطلب رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بیشک اللہ تعالیٰ نے اس بستی کو شرک سے پاک فرما دیا ہے، بشرطیکہ ستارے انہیں گمراہ نہ کر دیں۔“ [مسند أبي يعلى الموصلي/مسند العباس بن عبد المطلب رضي الله عنه/حدیث: 6714]

سیدنا عباس بن عبد المطلب رضی اللہ عنہ سے روایت ہے کہ انہوں نے عرض کیا: ”اے اللہ کے رسول صلی اللہ علیہ وسلم ! کیا آپ نے ابوطالب کو (ان کی خدمات کا) کوئی فائدہ پہنچایا ہے؟ کیونکہ وہ آپ کی حفاظت و نگہبانی کیا کرتے تھے اور آپ کی خاطر (مخالفین پر) غصہ ہوتے تھے،“ تو آپ صلی اللہ علیہ وسلم نے ارشاد فرمایا: ”وہ آگ کے ایک اتھلے حصے میں ہیں، اور اگر میں نہ ہوتا تو وہ یقیناً جہنم کے سب سے نچلے طبقے میں ہوتے۔“ [مسند أبي يعلى الموصلي/مسند العباس بن عبد المطلب رضي الله عنه/حدیث: 6715]