سیدہ ام سلمہ رضی اللہ عنہا سے روایت ہے کہ میں نے رسول اللہ صلی اللہ علیہ وسلم کو یہ ارشاد فرماتے ہوئے سنا: ”جس نے مسجدِ اقصیٰ سے عمرہ اور حج کا احرام باندھا، اس کے گزشتہ گناہ معاف کر دیے جائیں گے۔“ راوی بیان کرتے ہیں کہ اسی حدیث کی بنا پر ام حکیم بیت المقدس تک گئیں اور وہاں سے عمرے کا احرام باندھا۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 7009]

سیدہ ام سلمہ رضی اللہ عنہا سے روایت ہے کہ ”رسول اللہ صلی اللہ علیہ وسلم جب نماز کا سلام پھیرتے تو آپ صلی اللہ علیہ وسلم کے سلام مکمل کرتے ہی خواتین کھڑی ہو جاتیں جبکہ آپ صلی اللہ علیہ وسلم تھوڑی دیر اپنی جگہ تشریف فرما رہتے تھے“، محمد بن شہاب زہری رحمہ اللہ فرماتے ہیں: ”ہمارا خیال ہے اور اللہ ہی بہتر جانتا ہے کہ آپ صلی اللہ علیہ وسلم کا یہ توقف اس لیے تھا تاکہ نمازی مردوں کے مسجد سے نکلنے سے قبل خواتین وہاں سے رخصت ہو جائیں۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 7010]

ابو عمران رحمہ اللہ سے روایت ہے کہ انہوں نے اپنے مالکان کے ہمراہ حج کیا، وہ بیان کرتے ہیں کہ میں ام المومنین سیدہ ام سلمہ رضی اللہ عنہا کی خدمت میں حاضر ہوا اور عرض کی: ”اے ام المومنین! میں نے اس سے پہلے کبھی حج نہیں کیا، تو میں پہلے کس کا آغاز کروں، عمرہ کا یا حج کا؟“ انہوں نے فرمایا: ”تم ان میں سے جس سے چاہو آغاز کر لو۔“ وہ کہتے ہیں کہ پھر میں ام المومنین سیدہ صفیہ رضی اللہ عنہا کے پاس آیا اور ان سے بھی یہی سوال کیا تو انہوں نے بھی مجھے ویسا ہی جواب دیا جیسا سیدہ ام سلمہ رضی اللہ عنہا نے دیا تھا۔ وہ بیان کرتے ہیں کہ پھر میں دوبارہ سیدہ ام سلمہ رضی اللہ عنہا کے پاس آیا اور انہیں سیدہ صفیہ رضی اللہ عنہا کے قول کی خبر دی تو سیدہ ام سلمہ رضی اللہ عنہا نے مجھ سے فرمایا کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے: «يَا آلَ مُحَمَّدٍ مَنْ حَجَّ مِنْكُمْ فَلْيُهِلَّ بِعُمْرَةٍ فِي حَجَّةٍ، أَوْ فِي حَجَّتِهِ» ”اے آلِ محمد! تم میں سے جو کوئی حج کرے، اسے چاہیے کہ وہ اپنے حج کے ساتھ ہی عمرے کا تلبیہ پکارے (یعنی عمرہ اور حج دونوں کی نیت کرے)۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 7011]

سیدہ ام سلمہ رضی اللہ عنہا سے روایت ہے کہ نبی کریم صلی اللہ علیہ وسلم نے ارشاد فرمایا: ”وہ عورت جس کا شوہر فوت ہو چکا ہو (وہ دورانِ عدت) نہ تو زرد رنگ (عصفر) سے رنگے ہوئے کپڑے پہنے، نہ ہی گیرو (سرخ مٹی) سے رنگے ہوئے لباس زیب تن کرے، نہ ہی زیورات پہنے، اور نہ ہی وہ خضاب (مہندی وغیرہ) لگائے اور نہ ہی سرمہ استعمال کرے۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 7012]

سیدہ ام سلمہ رضی اللہ عنہا سے مروی ہے کہ انہوں نے ابو عبد اللہ الجدلی رحمہ اللہ سے دریافت فرمایا: ”کیا منبروں پر رسول اللہ صلی اللہ علیہ وسلم کی شان میں گستاخی کی جا رہی ہے؟“ انہوں نے عرض کیا: ”اور یہ کیسے ممکن ہے؟“ سیدہ رضی اللہ عنہا نے فرمایا: ”کیا سیدنا علی رضی اللہ عنہ اور ان سے محبت رکھنے والوں کو سب و شتم کا نشانہ نہیں بنایا جا رہا؟ پس میں اس بات کی گواہی دیتی ہوں کہ یقیناً رسول اللہ صلی اللہ علیہ وسلم ان (علی رضی اللہ عنہ) سے محبت فرمایا کرتے تھے۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 7013]

سیدہ ام سلمہ رضی اللہ عنہا سے روایت ہے کہ انہوں نے بیان فرمایا: ”رسول اللہ صلی اللہ علیہ وسلم کو تمام ملبوسات میں قمیص سب سے زیادہ محبوب تھی“۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 7014]

سیدہ ام سلمہ رضی اللہ عنہا سے روایت ہے کہ انہوں نے بیان کیا: ”میں رسول اللہ صلی اللہ علیہ وسلم کے ساتھ آپ کے لحاف میں تھی کہ مجھے وہ عارضہ لاحق ہو گیا جو عورتوں کو ہوتا ہے، چنانچہ میں خاموشی سے لحاف سے نکل گئی، اس پر رسول اللہ صلی اللہ علیہ وسلم نے دریافت فرمایا: «أَنَفِسْتِ؟» ”کیا تمہیں حیض آ گیا ہے؟“ میں نے عرض کیا: جی ہاں، آپ صلی اللہ علیہ وسلم نے ارشاد فرمایا: «ذَاكَ مَا كُتِبَ عَلَى بَنَاتِ آدَمَ» ”یہ وہ چیز ہے جو اللہ تعالیٰ نے آدم کی بیٹیوں کے مقدر میں لکھ دی ہے“ چنانچہ میں نے اپنی حالت درست کی اور پھر واپس آ گئی تو آپ صلی اللہ علیہ وسلم نے فرمایا: «تَعَالَيْ وَادْخُلِي مَعِي» ”قریب آؤ اور میرے ساتھ (لحاف میں) داخل ہو جاؤ“، سیدہ فرماتی ہیں کہ پھر میں آپ صلی اللہ علیہ وسلم کے ساتھ لحاف میں داخل ہوگئی۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 7015]

سیدہ ام سلمہ رضی اللہ عنہا سے روایت ہے کہ ”وہ اور رسول اللہ صلی اللہ علیہ وسلم جنابت کی حالت میں ایک ہی برتن سے غسل فرمایا کرتے تھے۔“ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 7016]

سیدہ ام سلمہ رضی اللہ عنہا سے روایت ہے کہ انہوں نے بیان کیا: ”رسول اللہ صلی اللہ علیہ وسلم میرے پاس تشریف لائے تو آپ صلی اللہ علیہ وسلم کا چہرہِ مبارک متغیر (رنگت بدلی ہوئی) تھا،“ وہ فرماتی ہیں: ”میں نے گمان کیا کہ شاید یہ کسی تکلیف یا بیماری کی وجہ سے ہے، چنانچہ میں نے عرض کی: یا رسول اللہ! کیا بات ہے کہ آپ صلی اللہ علیہ وسلم کا چہرہ مبارک مرجھایا ہوا ہے؟ آپ صلی اللہ علیہ وسلم نے ارشاد فرمایا: ”ان سات دیناروں کی فکر کی وجہ سے ایسا ہے جو ہم نے کل سنبھال کر رکھے تھے، شام ہوگئی اور ہم نے انہیں تقسیم نہیں کیا، جبکہ وہ (ابھی تک) بستر کے ایک گوشے میں پڑے ہوئے ہیں۔““ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 7017]

سیدہ ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم ”کھجور کے پتوں سے تیار کردہ چھوٹے مصلے (خمرہ) پر نماز ادا فرمایا کرتے تھے“۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 7018]