سیدنا عبداللہ بن عمرو بن العاص رضی اللہ عنہما بیان کرتے ہیں: ”میں آیا تو رسول اللہ صلی اللہ علیہ وسلم اپنے چند صحابہ کے درمیان تشریف فرما تھے، جن میں سیدنا عمر بن خطاب رضی اللہ عنہ بھی تھے، میں نے گفتگو کا آخری حصہ پایا کہ رسول اللہ صلی اللہ علیہ وسلم فرما رہے تھے: ”جس نے عصر سے پہلے چار رکعتیں پڑھیں اسے آگ نہیں چھوئے گی۔“ تو میں نے اپنے ہاتھ سے یوں اشارہ کیا (راوی نے ہاتھ ہلا کر دکھایا) اور کہا: ”یہ بڑی عمدہ حدیث ہے۔“ اس پر سیدنا عمر بن خطاب رضی اللہ عنہ نے مجھ سے فرمایا: ”جو حصہ تم سے حدیث کے شروع کا رہ گیا ہے وہ اس سے کہیں زیادہ عمدہ ہے۔“ میں نے کہا: ”اے ابن خطاب! تو پھر سنائیے۔“ سیدنا عمر بن خطاب رضی اللہ عنہ نے فرمایا: ”رسول اللہ صلی اللہ علیہ وسلم نے ہمیں بیان فرمایا: ”جس نے گواہی دی کہ اللہ کے سوا کوئی معبود نہیں، وہ جنت میں داخل ہو گیا۔““
امام طبرانی رحمہ اللہ فرماتے ہیں: ”یہ حدیث سیدنا عبداللہ بن عمرو رضی اللہ عنہما سے بواسطہ سیدنا عمر رضی اللہ عنہ صرف اسی سند سے روایت کی جاتی ہے، اس میں حجاج منفرد ہیں۔“ [المعجم الأوسط/باب الألف/حدیث: 2580]