سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے بدر کے دن ایک خیمے میں قیام کے دوران دعا فرمائی: «اللَّهُمَّ أَسْأَلُكَ عَهْدَكَ وَوَعْدَكَ، اللَّهُمَّ إِنْ شِئْتَ لَمْ تُعْبَدْ بَعْدَ الْيَوْمِ» ”اے اللہ! میں تجھ سے تیرے عہد اور تیرے وعدے کا سوال کرتا ہوں، اے اللہ! اگر تو چاہے تو آج کے بعد (زمین پر) تیری عبادت نہ کی جائے۔“ تو سیدنا ابوبکر رضی اللہ عنہ نے آپ صلی اللہ علیہ وسلم کا ہاتھ پکڑ لیا اور عرض کیا: ”اے اللہ کے رسول! آپ کے لیے یہی کافی ہے، یقیناً آپ نے اپنے رب کے حضور بڑی الحاح و زاری کر لی۔“ اس وقت آپ صلی اللہ علیہ وسلم زرہ پہنے ہوئے تھے اور اپنا ہاتھ (خیمے سے) باہر نکالتے ہوئے فرما رہے تھے: ﴿سَيُهْزَمُ الْجَمْعُ وَيُوَلُّونَ الدُّبُرَ بَلِ السَّاعَةُ مَوْعِدُهُمْ وَالسَّاعَةُ أَدْهَى وَأَمَرُّ﴾ ”عنقریب یہ جتھہ شکست کھا جائے گا اور پیٹھ پھیر کر بھاگے گا، بلکہ قیامت ان کے (عذاب کے) وعدے کا اصل وقت ہے اور قیامت بڑی سخت اور کڑوی چیز ہے۔“
امام طبرانی رحمہ اللہ فرماتے ہیں: ”اس حدیث کو خالد سے صرف عبد الوہاب ثقفی نے روایت کیا ہے۔“ [المعجم الأوسط/باب الألف/حدیث: 2746]