ابراہیم بن ابی عبلہ رحمہ اللہ بیان کرتے ہیں کہ میں اریحا میں بیٹھا ہوا تھا کہ سیدنا واثلہ بن اسقع رضی اللہ عنہ میرے پاس سے گزرے، وہ عبد اللہ بن دیلمی رحمہ اللہ کے سہارے ٹیک لگائے ہوئے تھے؛ انہوں نے انہیں بٹھایا، پھر وہ (عبد اللہ) میرے پاس آئے اور کہا: ”شیخ (یعنی سیدنا واثلہ رضی اللہ عنہ) نے مجھے جو حدیث سنائی ہے وہ بڑی عجیب ہے!“
میں نے پوچھا: ”انہوں نے آپ سے کیا بیان کیا؟“ انہوں نے کہا کہ سیدنا واثلہ رضی اللہ عنہ نے فرمایا: ”ہم غزوہ تبوک میں نبی صلی اللہ علیہ وسلم کے ساتھ تھے کہ آپ صلی اللہ علیہ وسلم کے پاس بنو سلیم کے کچھ لوگ حاضر ہوئے اور عرض کی: ”اے اللہ کے رسول! ہمارے ایک ساتھی نے (اپنے گناہ کی وجہ سے جہنم کو) واجب کر لیا ہے“، تو رسول اللہ صلی اللہ علیہ وسلم نے فرمایا: ”اس کی طرف سے ایک گردن (غلام) آزاد کرو، اللہ تعالیٰ اس (غلام) کے ہر عضو کے بدلے اس (شخص) کے ایک عضو کو آگ سے آزاد کر دے گا۔““ [المعجم الأوسط/باب الباء/حدیث: 3181]