سعد بن ہشام رحمہ اللہ بیان کرتے ہیں کہ میں نے ام المومنین سیدہ عائشہ رضی اللہ عنہا سے نبی کریم صلی اللہ علیہ وسلم کے قیامِ (تہجد) کے بارے میں دریافت کیا تو انہوں نے فرمایا: ”آپ صلی اللہ علیہ وسلم کے لیے وضو کا پانی اور مسواک رکھ دی جاتی تھی، پھر اللہ تعالیٰ رات کو جب چاہتا آپ صلی اللہ علیہ وسلم کو بیدار فرما دیتا، تو آپ صلی اللہ علیہ وسلم مسواک فرماتے اور وضو کرتے، پھر نماز کے لیے کھڑے ہوتے اور نو رکعات ادا فرماتے، اور دو رکعتیں بیٹھ کر پڑھتے تھے۔ اور جب آپ صلی اللہ علیہ وسلم علیل ہوتے یا (کسی عذر کی بنا پر) رات کو بیدار نہ ہو پاتے تو (اس کے بدلے دن میں) بارہ رکعات ادا فرماتے تھے۔“ [المعجم الأوسط/باب العين/حدیث: 4404]