سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”آپس میں حسد نہ کرو، ایک دوسرے سے پیٹھ نہ پھیرو، اور اللہ کے بندو! آپس میں بھائی بھائی بن جاؤ۔ کسی مسلمان کے لیے جائز نہیں کہ وہ اپنے بھائی سے تین دن سے زیادہ اس طرح قطع تعلق رکھے کہ دونوں ملیں تو یہ بھی منہ پھیر لے اور وہ بھی منہ پھیر لے، اور ان میں سے جو سلام میں پہل کرتا ہے وہ جنت کی طرف سبقت لے جاتا ہے۔“
امام طبرانی رحمہ اللہ فرماتے ہیں: ”امام زہری رحمہ اللہ سے اس حدیث کو روایت کرنے والوں میں سے کسی نے بھی یہ الفاظ ”اور جو سلام میں پہل کرتا ہے وہ جنت کی طرف سبقت لے جاتا ہے“ بیان نہیں کیے، سوائے عبداللہ بن عمر کے، اور عبداللہ بن عمر سے خالد کے سوا کسی نے اسے روایت نہیں کیا، اس میں وہب بن بقیہ منفرد ہیں۔ اور اسے ابو نعیم نے بھی عبداللہ بن عمر سے روایت کیا ہے۔“ [المعجم الأوسط/باب الميم/حدیث: 7874]