سیدنا براء بن عازب رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جو شخص جنازے کے ساتھ جائے یہاں تک کہ اس کی نمازِ جنازہ پڑھ لی جائے تو اس کے لیے اجر کا ایک قیراط ہے، اور جو جنازے کے ساتھ چلے یہاں تک کہ اسے دفن کر دیا جائے تو اس کے لیے اجر کے دو قیراط ہیں، اور قیراط احد (پہاڑ) کے برابر ہے۔“
امام طبرانی رحمہ اللہ فرماتے ہیں: ”اس حدیث کو مسیب بن رافع سے برد کے سوا کسی نے روایت نہیں کیا، اس میں عبثر منفرد ہیں، اور سیدنا براء رضی اللہ عنہ سے یہ حدیث صرف اسی سند سے مروی ہے۔“ [المعجم الأوسط/باب الميم/حدیث: 7998]