سیدنا عبداللہ بن عباس رضی اللہ عنہما سے روایت ہے کہ قریش نے یہود سے کہا: ”ہمیں کوئی ایسی چیز بتاؤ جس کے بارے میں ہم اس شخص (محمد صلی اللہ علیہ وسلم ) سے سوال کریں۔“ انہوں نے کہا: ”ان سے روح کے بارے میں پوچھو۔“ چنانچہ انہوں نے آپ صلی اللہ علیہ وسلم سے پوچھا تو یہ آیت نازل ہوئی: ﴿وَيَسْأَلُونَكَ عَنِ الرُّوحِ قُلِ الرُّوحُ مِنْ أَمْرِ رَبِّي وَمَا أُوتِيتُمْ مِنَ الْعِلْمِ إِلَّا قَلِيلًا﴾ (اور وہ آپ سے روح کے بارے میں سوال کرتے ہیں، آپ کہہ دیجیے کہ روح میرے رب کے حکم سے ہے اور تمہیں علم بہت ہی تھوڑا دیا گیا ہے)۔ اس پر انہوں نے کہا: ”ہمیں تو بہت زیادہ علم دیا گیا ہے۔“ تو یہ آیت نازل ہوئی: ﴿قُلْ لَوْ كَانَ الْبَحْرُ مِدَادًا لِكَلِمَاتِ رَبِّي﴾ (کہہ دیجیے کہ اگر سمندر میرے رب کے کلمات کے لیے روشنائی بن جائے...) آخر آیت تک۔
امام طبرانی رحمہ اللہ فرماتے ہیں: ”یہ حدیث داود بن ابی ہند سے ابن ابی زائدہ کے سوا کسی نے روایت نہیں کی، اور ان سے روایت کرنے میں قتیبہ منفرد ہیں۔“ [المعجم الأوسط/باب الميم/حدیث: 8002]