ام المومنین سیدہ صفیہ رضی اللہ عنہا بیان کرتی ہیں: ”رسول اللہ صلی اللہ علیہ وسلم میرے پاس تشریف لائے تو میرے سامنے چار ہزار گٹھلیاں پڑی تھیں جن پر میں تسبیح پڑھ رہی تھی۔ آپ صلی اللہ علیہ وسلم نے فرمایا: ”اے حیی کی بیٹی! یہ کیا ہے؟“ میں نے عرض کیا: ”میں ان پر تسبیح پڑھ رہی ہوں۔“ آپ صلی اللہ علیہ وسلم نے فرمایا: ”جب سے میں تمہارے پاس کھڑا ہوا ہوں، میں نے اس سے کہیں زیادہ تسبیح پڑھ لی ہے۔“ میں نے عرض کیا: ”اے اللہ کے رسول! مجھے (بھی) سکھا دیجیے۔“ آپ صلی اللہ علیہ وسلم نے فرمایا: ”یوں کہو: «سُبْحَانَ اللهِ عَدَدَ مَا خَلَقَ مِنْ شَيْءٍ» ”اللہ پاک ہے، اس کی مخلوق میں سے ہر چیز کی تعداد کے برابر۔““
امام طبرانی رحمہ اللہ فرماتے ہیں: ”ان احادیث کو کنانہ سے، انہوں نے سیدہ صفیہ رضی اللہ عنہا سے، ہاشم بن سعید کوفی کے سوا کسی نے روایت نہیں کیا، ان میں شاذ (بن فیاض) منفرد ہیں۔“ [المعجم الأوسط/باب الميم/حدیث: 8504]