ام المومنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم گھر کے جس حصے کے قریب ہوتے وہیں نماز پڑھ لیتے تھے۔ تو سیدہ عائشہ رضی اللہ عنہا نے آپ صلی اللہ علیہ وسلم سے عرض کیا: ”اے اللہ کے رسول! بسا اوقات آپ ایسی جگہ نماز پڑھتے ہیں جہاں سے حائضہ عورت گزرتی ہے، کاش آپ نماز پڑھنے کے لیے ایک مخصوص جگہ مقرر کر لیتے۔“ تو آپ صلی اللہ علیہ وسلم نے فرمایا: ”اے عائشہ! تم پر تعجب ہے، کیا تمہیں معلوم نہیں کہ مومن کا سجدہ اس جگہ کو ساتوں زمینوں تک پاک کر دیتا ہے؟“
امام طبرانی رحمہ اللہ فرماتے ہیں: ”معبد رحمہ اللہ نے سیدہ عائشہ رضی اللہ عنہا سے اس کے سوا کوئی حدیث روایت نہیں کی، اور معبد رحمہ اللہ سے بھی ان کے بیٹے زہرہ رحمہ اللہ کے سوا کسی نے اسے روایت نہیں کیا، اس میں لیث رحمہ اللہ منفرد ہیں۔“ [المعجم الأوسط/باب الميم/حدیث: 8687]