سیدنا عبداللہ بن عمر رضی اللہ عنہما سے روایت ہے کہ سیدنا ابوبکر رضی اللہ عنہ نے سیدنا جعفر بن ابی طالب رضی اللہ عنہ کے بعد سیدہ اسماء بنت عمیس رضی اللہ عنہا سے نکاح کیا، پھر وہ سیدہ اسماء رضی اللہ عنہا کے پاس جانے کے لیے آئے تو دیکھا کہ ان کے گھر میں کچھ لوگ بیٹھے ہیں، چنانچہ وہ نبی اللہ صلی اللہ علیہ وسلم کے پاس لوٹ گئے اور آپ صلی اللہ علیہ وسلم کو بتایا۔ آپ صلی اللہ علیہ وسلم نے فرمایا: ”ابوبکر! کیا بات ہے؟“ انہوں نے عرض کیا: ”میں نے تو کوئی برائی نہیں دیکھی۔“ تو رسول اللہ صلی اللہ علیہ وسلم نے فرمایا: ”اللہ نے اسے اس سے بری رکھا ہے۔“ پھر نبی اللہ صلی اللہ علیہ وسلم کھڑے ہوئے اور فرمایا: ”کوئی آدمی کسی ایسی عورت کے پاس نہ جائے جس کا شوہر گھر سے غائب ہو، مگر یہ کہ اس کے ساتھ کوئی اور بھی ہو۔“
امام طبرانی رحمہ اللہ فرماتے ہیں: ”یہ حدیث جبیر بن نفیر رحمہ اللہ سے صرف بکر بن سوادہ رحمہ اللہ نے روایت کی ہے، اور بکر رحمہ اللہ سے صرف جعفر رحمہ اللہ نے، اور لیث رحمہ اللہ اس میں منفرد ہیں۔“ [المعجم الأوسط/باب الميم/حدیث: 8804]