سیدنا جابر بن عبداللہ رضی اللہ عنہما فرماتے ہیں: رسول اللہ صلی اللہ علیہ وسلم نے ہمیں سیدنا ابو عبیدہ بن جراح رضی اللہ عنہ کے ساتھ روانہ کیا۔ ہم چھ سو دس سے کچھ اوپر آدمی تھے اور قریش کے تجارتی قافلے کی گھات میں نکلے تھے۔ رسول اللہ صلی اللہ علیہ وسلم نے ہمارے لیے زادِ راہ کے طور پر کھجوروں کے ایک تھیلے کے سوا کچھ نہ پایا، چنانچہ وہ ہمیں روزانہ ایک ایک کھجور دیا کرتے تھے، ہم اسے چوستے اور اوپر سے پانی پی لیتے۔ جب وہ ختم ہو گئیں تو ہمیں ان کی کمی محسوس ہوئی۔ پھر ہم نے خبط (درخت کے پتوں) کا رخ کیا، انہیں اپنی لاٹھیوں سے جھاڑتے، پھر انہیں پھانک لیتے اور اوپر سے پانی پی لیتے، یہاں تک کہ ہمارا نام «جیشُ الخبط» (پتوں والا لشکر) پڑ گیا۔ پھر ہم سمندر کے ساحل پر سے گزرے تو سمندر نے ہمارے لیے ایک جانور باہر پھینک دیا جسے عنبر کہا جاتا ہے، جو ریت کے ٹیلے کی طرح (بہت بڑا) تھا۔ سیدنا ابو عبیدہ رضی اللہ عنہ نے کہا: ”یہ مردار ہے، ہمارے لیے حلال نہیں۔“ پھر بعد میں کہا: ”نہیں، بلکہ ہم اللہ کی راہ میں (نکلے ہوئے) ہیں اور مجبور بھی ہیں، (لہٰذا کھاؤ)۔“ چنانچہ ہم نے اس میں سے تقریباً آدھے مہینے سے کچھ زیادہ مدت تک کھایا، اور ہم نے بہت سا گوشت قدید (سکھا کر محفوظ) بھی کر لیا۔ ہم اس کی آنکھ کے حلقے میں سے مٹکوں کے ساتھ چربی نکالتے رہے یہاں تک کہ ہم نے اسے پورا نکال لیا۔ پھر اس کی آنکھ کے حلقے میں ہم میں سے تیرہ آدمی بیٹھ گئے۔ پھر سیدنا ابو عبیدہ رضی اللہ عنہ نے اس کی پسلیوں میں سے ایک پسلی لی اور اسے اس کے دونوں سروں پر کھڑا کر دیا، اور قافلے کے سب سے لمبے اونٹ کے بارے میں حکم دیا تو اس پر کجاوہ کسا گیا، پھر ایک آدمی اس پر سوار ہوا تو وہ اس (پسلی) کے نیچے سے گزر گیا اور اس کا سر اسے نہ لگا۔ پھر ہم رسول اللہ صلی اللہ علیہ وسلم کے پاس آئے تو آپ صلی اللہ علیہ وسلم نے فرمایا: ”کیا تمہارے پاس اس میں سے کچھ ہے؟“ ہم نے عرض کیا: جی ہاں۔ آپ صلی اللہ علیہ وسلم نے فرمایا: ”ہمیں بھی اس میں سے کھلاؤ۔“ چنانچہ ہم نے آپ صلی اللہ علیہ وسلم کی خدمت میں قدید کا ایک ٹکڑا بھیجا تو آپ صلی اللہ علیہ وسلم نے اس میں سے تناول فرمایا۔
امام طبرانی رحمہ اللہ فرماتے ہیں: ”ان احادیث کو زیاد بن سعد رحمہ اللہ سے زمعہ کے سوا کسی نے روایت نہیں کیا، اور ابو قرہ ان کی روایت میں منفرد ہیں۔“ [المعجم الأوسط/باب الميم/حدیث: 9202]