عمرو بن یحییٰ مازنی رحمہ اللہ اپنے والد سے روایت کرتے ہیں کہ سیدنا ضحاک بن خلیفہ رضی اللہ عنہ نے اپنے لیے عریض سے ایک چھوٹی نہر (نالہ) کھودی اور اسے سیدنا محمد بن مسلمہ رضی اللہ عنہ کی زمین سے گزارنے کا ارادہ کیا تو سیدنا محمد بن مسلمہ رضی اللہ عنہ نے انکار کر دیا۔ اس (معاملے) کی خبر سیدنا ضحاک رضی اللہ عنہ نے سیدنا عمر بن خطاب رضی اللہ عنہ کو دی۔ انہوں نے سیدنا محمد بن مسلمہ رضی اللہ عنہ کو بلایا اور حکم دیا کہ ان کے لیے راستہ چھوڑ دے۔ سیدنا محمد بن مسلمہ رضی اللہ عنہ نے انکار کر دیا تو سیدنا عمر رضی اللہ عنہ نے کہا: ”تو اپنے بھائی کو اس چیز سے کیوں روکتا ہے جو اس کے لیے فائدہ مند ہے اور تیرے لیے بھی؟ اول و آخر تو بھی اس سے پیئے گا (کھیتی کو پلائے گا)، تیرے لیے یہ نقصان دہ نہیں۔“ سیدنا محمد بن مسلمہ رضی اللہ عنہ نے کہا: ”نہیں“، یعنی انکار کیا، تو سیدنا عمر رضی اللہ عنہ نے کہا: ”اللہ کی قسم! وہ اس (نہر) کو ضرور گزارے گا اگرچہ تیرے پیٹ سے گزرے۔“
یہ روایت مرسل (منقطع) ہے، اور یحییٰ بن سعید انصاری نے بھی اسی معنی میں روایت کیا ہے اور وہ بھی مرسل ہے۔ [السنن الكبرى للبيهقي/كتاب إحياء الموات/حدیث: 11882]