عروہ بن زبیر رحمہ اللہ مروان بن حکم اور مسور بن مخرمہ رضی اللہ عنہما سے نقل فرماتے ہیں کہ رسول اللہ صلی اللہ علیہ وسلم اور قریش کے درمیان حدیبیہ کے دن صلح ہوئی کہ جو چاہے محمد صلی اللہ علیہ وسلم کے عہد میں شامل ہو جائے اور جو چاہے قریش کے عہد اور معاہدے میں شامل ہو جائے، تو بنو خزاعہ نے نبی صلی اللہ علیہ وسلم کے عہد اور معاہدہ میں شمولیت اختیار کر لی اور بنو بکر قریش کے عہد میں شامل ہو گئے۔ وہ اس صلح میں تقریباً سترہ یا اٹھارہ ماہ رہے، پھر بنو بکر نے، جو قریش کے عہد میں شامل تھے، بنو خزاعہ پر حملہ کر دیا، وتیر نامی جگہ پر جو مکہ کے قریب تھی، قریش نے کہا کہ اس رات محمد صلی اللہ علیہ وسلم یا کوئی اور ہمیں دیکھ نہیں رہا، تو انہوں نے بنو بکر کی بنو خزاعہ کے خلاف اسلحے سے مدد کی اور رسول اللہ صلی اللہ علیہ وسلم سے کینہ کی وجہ سے خود بھی ان کے ساتھ لڑے، تو عمرو بن سالم رضی اللہ عنہ سوار ہو کر نبی صلی اللہ علیہ وسلم کے پاس آئے اور بنو خزاعہ کی خبر دی اور نبی صلی اللہ علیہ وسلم کے پاس آ کر یہ اشعار پڑھے:
”اے اللہ! میں محمد صلی اللہ علیہ وسلم کو قسم دیتا ہوں اپنے باپ کی اور ان کے باپ کی جو مال والے ہیں۔ ہم والد تھے اور آپ بچے تھے، پھر ہم اسلام لے آئے اور ہم نے ہاتھ نہیں کھینچا۔ (اے اللہ!) تو رسول اللہ صلی اللہ علیہ وسلم کی واضح مدد کر۔ اللہ کے بندوں کو پکارو وہ مدد کے لیے آئیں گے۔ ان میں اللہ کے رسول ہیں جو تنہا رہ گئے ہیں۔ اگر گہری نظر سے دیکھو تو ان کا چہرہ چمک رہا ہے، ایسے لشکر میں جو سمندر کی طرح ہے اور غبار اڑا رہا ہے۔ قریش نے آپ سے وعدہ خلافی کی ہے اور آپ کے پختہ عہد کو توڑا ہے۔ ان کا گمان ہے کہ ہم کسی کو نہیں پکاریں گے، حالانکہ وہ رسوا اور کم تعداد والے ہیں۔ انہوں نے میرے لیے کداء مقام میں مورچہ بنا دیا ہے، ہم نے آرام پانے کے لیے سو کر رات گزاری، تو انہوں نے ہم سے اس حال میں جنگ لڑی جب ہم رکوع و سجود کی حالت میں تھے۔“
رسول اللہ صلی اللہ علیہ وسلم نے فرمایا: ”اے عمرو بن سالم! تو مدد کیا گیا ہے“، وہ ٹھہرا رہا کہ آسمان سے بادل گزرے، رسول اللہ صلی اللہ علیہ وسلم نے فرمایا: ”یہ بادل بنو کعب کی مدد کی نشانی ہے“ اور رسول اللہ صلی اللہ علیہ وسلم نے لوگوں کو تیاری کا حکم دے دیا اور نکلنے کے راز کو پوشیدہ رکھا اور اللہ رب العزت سے دعا کی کہ قریش کو خبر نہ ہو یہاں تک کہ ان کے شہر پر حملہ کر دیا جائے۔ [السنن الكبرى للبيهقي/كتاب الجزية/حدیث: 18859]