سیدنا عمران بن حصین رضی اللہ عنہ بیان کرتے ہیں: میں نبی اکرم صلی اللہ علیہ وسلم کے پاس بیٹھا ہوا تھا اسی دوران سیدہ فاطمہ رضی اللہ عنہا تشریف لائیں اور نبی اکرم صلی اللہ علیہ وسلم کے سامنے آ کر کھڑی ہو گئیں۔ نبی اکرم صلی اللہ علیہ وسلم نے فرمایا: فاطمہ قریب آ جاؤ، وہ قریب آ گئیں، پھر نبی اکرم صلی اللہ علیہ وسلم نے فرمایا: فاطمہ قریب آ جاؤ، وہ مزید قریب آ گئیں، پھر نبی اکرم صلی اللہ علیہ وسلم نے فرمایا: فاطمہ قریب آ جاؤ، وہ اور قریب آ گئیں، یہاں تک کہ نبی اکرم صلی اللہ علیہ وسلم کے سامنے کھڑی ہو گئیں۔ سیدنا عمران رضی اللہ عنہ کہتے ہیں: میں نے ان کے چہرے پر زردی دیکھی، ان کا خون کم ہو چکا تھا۔ نبی اکرم صلی اللہ علیہ وسلم نے اپنی انگلیاں بڑھائیں اور پھر اپنا ہاتھ ان کے سینے پر رکھا، پھر آپ نے سر اٹھا کر یہ دعا کی: ”اے اللہ! بھوک کو ختم کرنے والے! حاجت کو پوری کرنے والے! پست کو بلندی عطا کرنے والے! تو فاطمہ بنت محمد کو بھوکا نہ رکھ۔“ راوی کہتے ہیں: تو میں نے دیکھا کہ ان کے چہرے سے بھوک کی زردی ختم ہو گئی اور خون ظاہر ہوا، اس کے بعد میں نے ان سے اس بارے میں دریافت کیا، تو انہوں نے بتایا: اے عمران! اس کے بعد مجھے کبھی بھوک محسوس نہیں ہوئی۔
یہ روایت امام طبرانی نے معجم اوسط میں نقل کی ہے۔ اس کی سند میں ایک راوی عقبہ بن حمید ہے، جسے ابن حبان اور دیگر حضرات نے ثقہ قرار دیا ہے، اور ایک جماعت نے اسے ضعیف کہا: ہے اس روایت کے بقیہ رجال کی توثیق کی گئی ہے۔ [مجمع الزاوئد ومنبع الفوائد/كتاب المناقب/حدیث: 15205]