عطاء اور عمرو بن شعیب رحمہما اللہ سے روایت ہے کہ ایک شخص نبی کریم صلی اللہ علیہ وسلم کی بارگاہ میں حاضر ہوا اور عرض گزار ہوا: اے اللہ کے رسول! میں تو تباہ ہو گیا، آپ صلی اللہ علیہ وسلم نے دریافت فرمایا: ”تمہیں کس چیز نے تباہ کیا؟“ اس نے عرض کی: میں نے رمضان (کے روزے) میں اپنی اہلیہ سے صحبت کر لی ہے، اسی اثنا میں رسول اللہ صلی اللہ علیہ وسلم کے پاس ایک گدھا لایا گیا جس پر کھجوریں لدی ہوئی تھیں، آپ صلی اللہ علیہ وسلم نے اس میں سے کچھ اسے دینے کا حکم دیا اور فرمایا: ”اسے پکڑو اور (بطورِ کفارہ) صدقہ کر دو۔“ اس شخص نے عرض کی: اے اللہ کے رسول! مدینہ کے ان دو پتھریلی زمینوں کے درمیان کوئی بھی گھرانہ میرے گھر والوں سے زیادہ مفلس نہیں ہے، یہ سن کر رسول اللہ صلی اللہ علیہ وسلم (اس طرح) ہنس پڑے کہ آپ صلی اللہ علیہ وسلم کے دہانِ مبارک کے دانت ظاہر ہو گئے، پھر آپ صلی اللہ علیہ وسلم نے ارشاد فرمایا: ”تو پھر اسے اپنے گھر والوں کو ہی کھلا دو، اور اس کے بدلے ایک دن کا روزہ رکھو، اور اللہ تعالیٰ سے معافی مانگو۔“ راوی کا بیان ہے کہ مجھے یاد نہیں کہ ان دونوں (عطاء اور عمرو) کے بیان میں یہ بات تھی یا ان میں سے کسی ایک نے کہا کہ: ”اس کے بدلے ایک دن کا روزہ رکھو اور اللہ تعالیٰ سے توبہ و استغفار کرو۔“
وضاحت: اس حدیث مبارکہ سے یہ علمی نکتہ مستنبط ہوتا ہے کہ شریعتِ مطہرہ میں نادار اور مفلس شخص کے لیے احکامِ کفارہ میں غیر معمولی سہولت موجود ہے اور یہ کہ رمضان کا روزہ جان بوجھ کر توڑنے کی صورت میں کفارے کے ساتھ ساتھ اس دن کی قضا کرنا بھی لازم ہے۔ [المطالب العالية بزوائد المسانيد الثمانية/كتاب الصيام/حدیث: 1034]