سیدنا حسن بن علی یا سیدنا حسین بن علی رضی اللہ عنہما اپنے گھر کی ایک خاتون سے روایت کرتے ہیں کہ رسول اللہ صلی اللہ علیہ وسلم اپنی پشت کے بل لیٹے ہوئے ایک ننھے بچے کو اپنے سینہ مبارک پر بٹھائے اس کے ساتھ کھیل رہے تھے کہ اسی دوران اس بچے نے پیشاب کر دیا، وہ خاتون اسے پکڑنے اور (اس حرکت پر) مارنے کے لیے لپکیں تو آپ صلی اللہ علیہ وسلم نے ارشاد فرمایا: ”اسے رہنے دو، اور میرے پاس پانی کا ایک کوزہ لے آؤ“، چنانچہ آپ صلی اللہ علیہ وسلم نے اس جگہ پر پانی چھڑکا یہاں تک کہ پانی پیشاب کے اوپر سے بہہ نکلا، پھر آپ صلی اللہ علیہ وسلم نے (حکم کی وضاحت کرتے ہوئے) ارشاد فرمایا: ”پیشاب کے ساتھ ایسا ہی معاملہ کیا جاتا ہے، لڑکے کے پیشاب پر پانی چھڑکا جاتا ہے اور لڑکی کے پیشاب کو دھویا جاتا ہے۔“ [المطالب العالية بزوائد المسانيد الثمانية/كتاب الطهارة/حدیث: 13]