سیدنا جابر بن عبداللہ رضی اللہ عنہما سے روایت ہے کہ ہم رسول اللہ صلی اللہ علیہ وسلم کے ہمراہ ایک سفر میں تھے کہ آپ صلی اللہ علیہ وسلم کا گزر دو ایسی قبروں پر ہوا جن کے مکینوں کو عذاب دیا جا رہا تھا، تو آپ صلی اللہ علیہ وسلم نے ارشاد فرمایا: ”انہیں کسی ایسی بات پر عذاب نہیں دیا جا رہا جسے وہ (بچنے کے لحاظ سے) کوئی بڑی بات سمجھتے تھے،“ پھر آپ صلی اللہ علیہ وسلم نے (حقیقت واضح کرتے ہوئے) فرمایا: ”کیوں نہیں! (وہ گناہ بڑے ہی ہیں)؛ ان میں سے ایک تو لوگوں کی غیبت کیا کرتا تھا، جبکہ دوسرا اپنے پیشاب کی چھینٹوں سے بچنے اور پاکیزگی اختیار کرنے میں احتیاط نہیں برتتا تھا۔“ پھر نبی کریم صلی اللہ علیہ وسلم نے کھجور کی ایک تروتازہ شاخ لی یا دو شاخیں لیں اور انہیں توڑ دیا، پھر آپ صلی اللہ علیہ وسلم نے ان شاخوں کے ہر ٹکڑے کو ایک ایک قبر پر گاڑ دیا اور ارشاد فرمایا: ”یقیناً ان کے عذاب میں اس وقت تک تخفیف کی جائے گی جب تک یہ شاخیں تروتازہ رہیں گی،“ یا آپ صلی اللہ علیہ وسلم نے یہ الفاظ فرمائے: ”جب تک یہ خشک نہیں ہو جاتیں۔“ اس حدیث کو امام بخاری اور امام مسلم نے مختلف سیاق کے ساتھ روایت کیا ہے اور یہ حدیث صحیح ہے۔ [المطالب العالية بزوائد المسانيد الثمانية/كتاب الطهارة/حدیث: 16]