سیدنا زید بن علی اپنے آباء و اجداد رضی اللہ عنہم کے واسطے سے روایت کرتے ہیں کہ رسول اللہ صلی اللہ علیہ وسلم نے دریافت فرمایا: ”لوگوں میں سب سے زیادہ ہوشیار اور زیرک کون ہے؟“ میں نے عرض کیا: اللہ اور اس کا رسول صلی اللہ علیہ وسلم بہتر جانتے ہیں۔ آپ صلی اللہ علیہ وسلم نے ارشاد فرمایا: ”بے شک لوگوں میں سب سے زیادہ عقل مند وہ شخص ہے جو موت کو سب سے زیادہ یاد کرنے والا ہو، اور اللہ تعالیٰ کی بارگاہ میں حاضری کے لیے سب سے بہترین تیاری کرنے والا ہو۔“
اس حدیث کی سند میں یحییٰ بن ہاشم غسانی نامی راوی متروک اور کذاب ہے، جس کی بنا پر یہ روایت موضوع (من گھڑت) کے درجے میں ہے، البتہ کثرت سے یادِ موت اور آخرت کی تیاری کا حکم دیگر مستند اور صحیح احادیث میں صراحت کے ساتھ موجود ہے۔ [المطالب العالية بزوائد المسانيد الثمانية/كتاب الرقائق/حدیث: 3121]