سیدنا مطلب بن ربیعہ رضی اللہ عنہ سے روایت ہے، وہ کہتے ہیں: سیدنا عباس رضی اللہ عنہ نبی اللہ صلی اللہ علیہ وسلم کے پاس غصے کی حالت میں آئے، آپ صلی اللہ علیہ وسلم نے پوچھا: ”تمہیں کیا بات یہاں لے آئی؟“ انہوں نے عرض کیا: یا رسول اللہ! ہمیں قریش سے کیا سلوک ملتا ہے؟ آپ صلی اللہ علیہ وسلم نے فرمایا: ”تمہیں ان سے کیا واسطہ پیش آیا کہ تم یہاں چلے آئے؟“ انہوں نے عرض کیا: وہ آپس میں ایک دوسرے سے خوش رو ہو کر ملتے ہیں، اور جب ہم سے ملتے ہیں تو اس کے برعکس سلوک کرتے ہیں۔ یہ سن کر آپ صلی اللہ علیہ وسلم کو غصہ آ گیا حتیٰ کہ آپ کی دونوں آنکھوں کے درمیان کی رگ ابھر آئی، پھر جب غصہ اتر گیا تو فرمایا: ”اس ذات کی قسم جس کے ہاتھ میں میری جان ہے! کسی آدمی کے دل میں ایمان داخل نہیں ہوتا جب تک وہ تم سے اللہ اور اس کے رسول کی خاطر محبت نہ کرے۔“ پھر فرمایا: ”لوگوں کو کیا ہو گیا ہے کہ وہ عباس کے بارے میں مجھے تکلیف پہنچاتے ہیں؟ آدمی کا چچا اس کے باپ کے مثل ہوتا ہے۔“ [المعجم الكبير للطبراني/باب الميم/حدیث: 17808]