سیدنا مطلب بن ربیعہ رضی اللہ عنہ سے روایت ہے: انصار کے کچھ لوگ رسول اللہ صلی اللہ علیہ وسلم کے پاس آئے اور عرض کیا: یا رسول اللہ! ہم کچھ لوگوں سے جفا کی بات سنتے ہیں، ان میں سے کہنے والا کہتا ہے: محمد صلی اللہ علیہ وسلم کی مثال تو صرف اس کھجور کے درخت جیسی ہے جو کوڑے کے ڈھیر میں اگ آیا ہو۔ یہ سن کر رسول اللہ صلی اللہ علیہ وسلم کھڑے ہوئے اور فرمایا: ”اے لوگو! میں کون ہوں؟“ لوگوں نے عرض کیا: آپ اللہ کے رسول ہیں۔ آپ صلی اللہ علیہ وسلم نے فرمایا: ”میں محمد بن عبداللہ بن عبدالمطلب ہوں“ - راوی کہتے ہیں: ہم نے آپ صلی اللہ علیہ وسلم کو اس سے پہلے کبھی اس طرح نسب بیان کرتے نہیں سنا تھا - ”بےشک اللہ نے اپنی مخلوق کو پیدا کیا تو مجھے اس کی بہترین مخلوق میں رکھا، پھر انہیں دو گروہوں میں تقسیم کیا تو مجھے بہتر گروہ میں رکھا، پھر انہیں قبیلوں میں تقسیم کیا تو مجھے ان کے بہترین قبیلے میں رکھا، پھر انہیں گھرانوں میں تقسیم کیا تو مجھے بہترین گھرانے میں رکھا، پس میں تم سب میں گھرانے کے اعتبار سے بھی بہتر ہوں اور ذات کے اعتبار سے بھی بہتر ہوں۔“ [المعجم الكبير للطبراني/باب الميم/حدیث: 17809]