سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم سیدہ ام سلیم رضی اللہ عنہا کے ہاں تشریف لائے، تو وہ آپ صلی اللہ علیہ وسلم کی خدمت میں گھی اور کھجوریں پیش کرنے کے لیے لائیں، جس پر آپ صلی اللہ علیہ وسلم نے فرمایا: ”اپنا گھی اس کے مشکیزے میں اور اپنی کھجوریں ان کے برتن میں واپس رکھ دو کیونکہ میں روزے سے ہوں“، پھر آپ صلی اللہ علیہ وسلم کھڑے ہوئے اور غیر فرض (نفل) نماز ادا فرمائی اور ہم نے بھی آپ صلی اللہ علیہ وسلم کے ساتھ نماز پڑھی، پھر آپ صلی اللہ علیہ وسلم نے سیدہ ام سلیم رضی اللہ عنہا اور ان کے گھر والوں کے لیے دعا فرمائی، جس پر سیدہ ام سلیم رضی اللہ عنہا نے عرض کی: میری ایک خاص حاجت ہے، آپ صلی اللہ علیہ وسلم نے دریافت فرمایا: ”وہ کیا ہے؟“ انہوں نے عرض کی: آپ کا خادم انس، تو آپ صلی اللہ علیہ وسلم نے میرے لیے دنیا اور آخرت کی ہر بھلائی کی دعا فرمائی اور یوں التجا کی: «اللَّهُمَّ ارْزُقْهُ مَالًا وَوَلَدًا وَبَارِكْ لَهُ فِيهِ» ”اے اللہ! اسے مال اور اولاد عطا فرما اور اسے ان میں برکت عطا فرما“، سیدنا انس رضی اللہ عنہ فرماتے ہیں کہ (اس دعا کی برکت سے) میں انصار میں سب سے زیادہ اولاد والا ہوں، اور مجھے میری صاحبزادی امینہ رحمہا اللہ نے بتایا کہ حجاج بن یوسف کے بصرہ آنے تک میری صلب سے پیدا ہونے والی اولاد میں سے ایک سو بیس سے زائد افراد دفن کیے جا چکے تھے۔ [مسند أبي يعلى الموصلي/مسند أنس بن مالك/حدیث: 3878]