حضرت ابوہریرہ رضی اللہ عنہ سے روایت ہے، انہوں نے فرمایا: جس رات رسول اللہ صلی اللہ علیہ وسلم کو معراج پر لے جایا گیا تو آپ کو دو پیالے پیش کیے گئے۔ ایک میں دودھ تھا اور دوسرے میں شراب۔ آپ نے ان دونوں کو دیکھا، پھر دودھ (والا پیالہ) پکڑ لیا۔ حضرت جبریل نے آپ سے فرمایا: «الْحَمْدُ لِلّٰهِ» ”اللہ تعالیٰ کا شکر ہے“ کہ اس نے آپ کو فطری چیز اختیار کرنے کی توفیق عطا فرمائی، اگر آپ شراب قبول کر لیتے تو آپ کی امت (مجموعی طور پر) گمراہ ہو جاتی۔ [سنن نسائي/كتاب الأشربة/حدیث: 5660]

نبی اکرم صلی اللہ علیہ وسلم کے ایک صحابی رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا: ”میری امت کے کچھ لوگ شراب پیئیں گے مگر اس کا نام کچھ اور رکھ لیں گے۔“ [سنن نسائي/كتاب الأشربة/حدیث: 5661]