حضرت انس رضی اللہ عنہ سے روایت ہے، انہوں نے کہا: نبی صلی اللہ علیہ وسلم کے پاس سے ایک جنازہ گزرا تو لوگوں نے اس کی تعریف کی، آپ صلی اللہ علیہ وسلم نے فرمایا: ”واجب ہو گئی۔“ پھر دوسرا جنازہ گزرا تو لوگوں نے اس کی برائی بیان کی یا اس کے علاوہ کچھ اور کہا تو آپ صلی اللہ علیہ وسلم نے پھر فرمایا: ”واجب ہو گئی۔“ آپ صلی اللہ علیہ وسلم سے عرض کیا گیا: اے اللہ کے رسول صلی اللہ علیہ وسلم ! آپ نے اس کے لیے بھی فرمایا: ”واجب ہو گئی۔“ اور اس کے لیے بھی فرمایا: ”واجب ہو گئی۔“ آپ صلی اللہ علیہ وسلم نے فرمایا: ”اس کا مقصد لوگوں کی گواہی کا واجب ہونا ہے کیونکہ اہل ایمان زمین پر اللہ کے گواہ ہیں۔“ [صحيح البخاري/كِتَاب الشَّهَادَاتِ/حدیث: 2642]

حضرت ابوالاسود رحمہ اللہ سے روایت ہے، انہوں نے کہا: میں ایک دفعہ مدینہ طیبہ آیا تو وہاں ایک وبائی مرض پھیلا ہوا تھا جس میں لوگ بڑی تیزی سے فوت ہو رہے تھے۔ میں حضرت عمر رضی اللہ عنہ کے پاس بیٹھا ہوا تھا کہ اتنے میں ایک جنازہ گزرا، اس کی تعریف کی گئی تو حضرت عمر رضی اللہ عنہ نے کہا: «وَجَبَتْ» ”واجب ہو گئی۔“ پھر دوسرا جنازہ گزرا، اس کی بھی تعریف کی گئی تو اس کے متعلق بھی حضرت عمر رضی اللہ عنہ نے فرمایا: «وَجَبَتْ» ”واجب ہو گئی۔“ پھر تیسرا جنازہ نکلا اور اس کی برائی بیان کی گئی تو حضرت عمر رضی اللہ عنہ نے فرمایا: «وَجَبَتْ» ”واجب ہو گئی۔“ میں نے عرض کیا: امیر المومنین! کیا چیز واجب ہو گئی؟ انہوں نے فرمایا: میں نے وہی کہا جو نبی صلی اللہ علیہ وسلم نے فرمایا تھا: ”جس مسلمان کے لیے چار آدمی اس کی نیک سیرتی کی گواہی دیں اللہ تعالیٰ اسے جنت میں داخل فرمائے گا۔“ ہم نے عرض کیا: اگر تین آدمی گواہی دیں تو؟ فرمایا: ”تین بھی۔“ ہم نے عرض کیا: اگر صرف دو آدمی گواہی دیں تو؟ آپ نے فرمایا: ”دو دیں تب بھی۔“ پھر ہم نے یہ نہ پوچھا کہ اگر ایک شخص گواہی دے تو کیا ہو گا؟ [صحيح البخاري/كِتَاب الشَّهَادَاتِ/حدیث: 2643]