حضرت ابوموسیٰ اشعری رضی اللہ عنہ سے روایت ہے کہ نبی صلی اللہ علیہ وسلم ایک باغ میں داخل ہوئے تو مجھے حکم دیا کہ باغ کے دروازے کی نگرانی کروں، چنانچہ ایک آدمی آیا اور اس نے اندر آنے کی اجازت طلب کی۔ آپ صلی اللہ علیہ وسلم نے فرمایا: ”اسے اجازت دو اور جنت کی بشارت بھی سنا دو۔“ وہ حضرت عمر رضی اللہ عنہ تھے۔ پھر ایک تیسرا شخص آیا تو اس نے بھی اندر آنے کی اجازت طلب کی تو آپ صلی اللہ علیہ وسلم تھوڑی دیر خاموش رہے۔ پھر آپ صلی اللہ علیہ وسلم نے فرمایا: ”اسے اجازت دو اور جنت کی بشارت بھی دو اس مصیبت پر جو اسے پہنچے گی۔“ وہ حضرت عثمان رضی اللہ عنہ تھے۔ حماد نے کہا: ہم سے عاصم احول اور علی بن حکم نے بیان کیا، انہوں نے ابوعثمان کو حضرت ابوموسیٰ اشعری رضی اللہ عنہ سے اس طرح بیان کرتے ہوئے سنا۔ عاصم نے اس میں یہ اضافہ ذکر کیا ہے کہ نبی صلی اللہ علیہ وسلم ایک جگہ تشریف فرما تھے جہاں پانی تھا، جبکہ آپ صلی اللہ علیہ وسلم نے دونوں گھٹنوں یا ایک گھٹنے سے کپڑا اٹھا رکھا تھا، جب حضرت عثمان رضی اللہ عنہ اندر آئے تو آپ صلی اللہ علیہ وسلم نے گھٹنوں پر کپڑا کر لیا۔ [صحيح البخاري/كِتَاب فَضَائِلِ الصحابة/حدیث: 3695]

حضرت عبید اللہ بن عدی بن خیار رضی اللہ عنہ سے روایت ہے کہ حضرت مسور بن مخرمہ رضی اللہ عنہ اور حضرت عبد الرحمن بن اسود بن عبد یغوث رضی اللہ عنہ نے ان سے کہا: ”تمہیں حضرت عثمان رضی اللہ عنہ سے ان کے بھائی ولید کے متعلق گفتگو کرنے میں کیا امر مانع ہے؟ لوگ اس کے متعلق بہت چہ میگویاں کرتے ہیں۔“ چنانچہ میں حضرت عثمان رضی اللہ عنہ کے پاس گیا۔ جب وہ نماز کے لیے تشریف لائے تو میں نے عرض کی: ”مجھے آپ سے ایک ضروری کام ہے جس میں آپ کے لیے خیر خواہی ہے۔“ حضرت عثمان رضی اللہ عنہ نے فرمایا: ”بھلے آدمی! میں تجھ سے اللہ کی پناہ چاہتا ہوں۔“ میں واپس آکر ان لوگوں کے پاس آگیا۔ اتنے میں حضرت عثمان رضی اللہ عنہ کا قاصد مجھے بلانے کے لیے آگیا۔ میں جب اس کے ہمراہ حضرت عثمان رضی اللہ عنہ کی خدمت میں حاضر ہوا تو انہوں نے دریافت فرمایا: ”بتاؤ، تمہاری خیر خواہی کیا تھی؟“ میں نے عرض کی: ”اللہ تعالیٰ نے حضرت محمد صلی اللہ علیہ وسلم کو حق دے کر مبعوث فرمایا اور آپ پر قرآن نازل کیا، نیز آپ ان لوگوں میں سے ہیں جنہوں نے اللہ اور اس کے رسول صلی اللہ علیہ وسلم کی دعوت کو قبول کیا۔ آپ نے دو ہجرتیں کیں اور رسول اللہ صلی اللہ علیہ وسلم کی صحبت اٹھائی اور آپ کے طریقے اور سنت کو ملاحظہ کیا۔ بات یہ ہے کہ لوگ ولید کے متعلق بہت باتیں کر رہے ہیں۔“ حضرت عثمان رضی اللہ عنہ نے فرمایا: ”کیا تو نے رسول اللہ صلی اللہ علیہ وسلم کو پایا ہے؟“ میں نے کہا: ”نہیں، لیکن آپ صلی اللہ علیہ وسلم کی احادیث مجھے پہنچی ہیں جیسا کہ کنواری لڑکی تک کو اس کے پردے کے باوجود پہنچ چکی ہیں۔“ اس پر حضرت عثمان رضی اللہ عنہ نے فرمایا: ”اللہ تعالیٰ نے حضرت محمد صلی اللہ علیہ وسلم کو حق دے کر مبعوث فرمایا اور میں اللہ اور اس کے رسول صلی اللہ علیہ وسلم کی دعوت کو قبول کرنے والوں میں ہی تھا۔ میں اس حق پر ایمان لایا جسے دے کر آپ کو بھیجا گیا تھا اور میں نے دو ہجرتیں کی ہیں جیسا کہ تو نے ذکر کیا ہے۔ بلا شبہ میں نے رسول اللہ صلی اللہ علیہ وسلم کی بیعت کی اور آپ کی صحبت میں رہا، اللہ کی قسم! میں نے کبھی آپ کی نافرمانی نہیں کی اور نہ کبھی آپ سے خیانت ہی کا ارتکاب کیا یہاں تک کہ اللہ تعالیٰ نے آپ کو وفات دی۔ اسی طرح حضرت ابوبکر رضی اللہ عنہ کے ساتھ بھی میرا یہی معاملہ رہا۔ حضرت عمر رضی اللہ عنہ کے ساتھ بھی میرا یہی رویہ تھا۔ پھر مجھے ان کا جانشین بنا دیا گیا۔ تو کیا مجھے وہ حقوق حاصل نہیں ہوں گے جو انہیں حاصل تھے؟“ میں نے عرض کیا: ”کیوں نہیں، ضرور حاصل ہوں گے۔“ آپ نے فرمایا: ”پھر ان باتوں کا کیا جواز باقی رہ جاتا ہے جو وقتاً فوقتاً تم لوگوں کی طرف سے مجھے پہنچتی رہتی ہیں؟ باقی جو تم نے ولید کے متعلق شکایت کی ہے، ان شاء اللہ ہم اس کی سزا جو واجب ہے ضرور دیں گے۔“ اس کے بعد حضرت عثمان رضی اللہ عنہ نے حضرت علی رضی اللہ عنہ کو بلایا اور انہیں فرمایا کہ وہ ولید کو کوڑے ماریں، چنانچہ انہوں نے ولید کو اسی (80) کوڑے بطور حد لگائے۔ [صحيح البخاري/كِتَاب فَضَائِلِ الصحابة/حدیث: 3696]

حضرت عثمان بن موہب رحمہ اللہ سے روایت ہے کہ اہل مصر میں سے ایک شخص آیا، اس نے بیت اللہ کا حج کیا تو لوگوں کو ایک جگہ بیٹھے ہوئے دیکھا، اس نے پوچھا: ”یہ کون لوگ ہیں؟“ لوگوں نے کہا: ”یہ قریش کے لوگ ہیں۔“ اس نے پوچھا: ”ان میں یہ بزرگ کون ہیں؟“ لوگوں نے بتایا: ”یہ حضرت عبد اللہ بن عمر رضی اللہ عنہما ہیں۔“ مصری نے کہا: ”اے عبد اللہ بن عمر! میں آپ سے چند باتوں کی وضاحت چاہتا ہوں۔ کیا آپ کو معلوم ہے کہ حضرت عثمان رضی اللہ عنہ اُحد کے دن میدان سے ہٹ گئے تھے؟“ انہوں نے فرمایا: ”ہاں (مجھے اس بات کا علم ہے)۔“ پھر اس نے کہا: ”کیا آپ جانتے ہیں کہ وہ جنگِ بدر سے بھی غائب تھے؟“ حضرت ابن عمر رضی اللہ عنہما نے فرمایا: ”ہاں (مجھے اس کا بھی علم ہے)۔“ اس نے کہا: ”کیا آپ اس سے آگاہ ہیں کہ وہ بیعتِ رضوان سے بھی غائب تھے اور اس میں شریک نہ ہوئے تھے؟“ انہوں نے فرمایا: ”ہاں (جانتا ہوں)۔“ تب اس شخص نے «اللهُ أَكْبَرُ» ”اللہ بہت بڑا ہے“ کا نعرہ بلند کیا۔ اس پر حضرت عبد اللہ بن عمر رضی اللہ عنہما نے فرمایا: ”ادھر آ، میں تجھے ان کی وضاحت کرتا ہوں۔ اُحد سے ہٹ جانے کی بابت تو میں گواہی دیتا ہوں کہ اللہ تعالیٰ نے انہیں معاف کر دیا اور انہیں بخش دیا۔ رہا بدر کی لڑائی میں شریک نہ ہونا! تو اس کی وجہ یہ تھی کہ ان کے نکاح میں رسول اللہ صلی اللہ علیہ وسلم کی صاحبزادی تھیں، وہ ان دنوں بیمار ہوئیں تو رسول اللہ صلی اللہ علیہ وسلم نے حضرت عثمان رضی اللہ عنہ سے فرمایا: ”(تم ان کی تیمارداری کرو) تمہیں جنگِ بدر میں شریک ہونے والوں کے برابر حصہ اور ثواب ملے گا۔“ باقی رہا ان کا بیعتِ رضوان سے غائب رہنا! تو اگر کوئی شخص مکہ میں حضرت عثمان رضی اللہ عنہ سے زیادہ باعزت ہوتا تو رسول اللہ صلی اللہ علیہ وسلم اسے روانہ کرتے، لہٰذا انہیں رسول اللہ صلی اللہ علیہ وسلم نے بھیجا تھا تو وہ چلے گئے اور جب بیعتِ رضوان ہوئی تو رسول اللہ صلی اللہ علیہ وسلم نے اپنے دائیں ہاتھ کو حضرت عثمان رضی اللہ عنہ کا ہاتھ قرار دے کر اسے اپنے بائیں ہاتھ کے اوپر رکھا اور فرمایا: ”یہ عثمان کی بیعت ہے۔“ پھر حضرت ابن عمر رضی اللہ عنہما نے اس شخص سے فرمایا: ”اب ان باتوں کو بھی اپنے ساتھ لے جا۔“ [صحيح البخاري/كِتَاب فَضَائِلِ الصحابة/حدیث: 3697]

حضرت عثمان بن مواہب رحمہ اللہ سے روایت ہے کہ اہل مصر سے ایک شخص آیا، اس نے بیت اللہ کا حج کیا تو لوگوں کو ایک جگہ بیٹھے ہوئے دیکھا۔ پوچھا: ”یہ کون لوگ ہیں؟“ لوگوں نے کہا: ”یہ قریش کے لوگ ہیں۔“ اس نے پوچھا: ”ان میں یہ بزرگ کون ہیں؟“ لوگوں نے بتایا: ”یہ حضرت عبد اللہ بن عمر رضی اللہ عنہ ہیں۔“ مصری نے کہا: ”اے عبد اللہ بن عمر! میں آپ سے چند باتوں کی وضاحت چاہتا ہوں۔ کیا آپ کو معلوم ہے کہ حضرت عثمان رضی اللہ عنہ اُحد کے دن میدان سے بھاگ نکلے تھے؟“ انہوں نے فرمایا: ”ہاں (مجھے اس بات کا علم ہے)۔“ پھر اس نے کہا: ”کیا آپ جانتے ہیں کہ وہ جنگ بدر سے بھی غائب تھے؟“ حضرت ابن عمر رضی اللہ عنہ نے فرمایا: ”ہاں (مجھے اس کا بھی علم ہے)۔“ اس نے کہا: ”کیا آپ اس سے آگاہ ہیں کہ وہ بیعت رضوان سے بھی غائب تھے اور اس میں شریک نہ ہوئے تھے؟“ انہوں نے فرمایا: ”ہاں (جانتا ہوں)۔“ تب اس شخص نے نعرہ تکبیر بلند کیا۔ اس پر حضرت عبد اللہ بن عمر رضی اللہ عنہ نے فرمایا: ”ادھر آ، میں تجھے ان کی وضاحت کرتا ہوں۔ اُحد سے بھاگ جانے کی بابت تو میں گواہی دیتا ہوں کہ اللہ تعالیٰ نے انہیں معاف کر دیا اور انہیں بخش دیا۔ رہا بدر کی لڑائی میں شریک نہ ہونا! تو اس کی وجہ یہ تھی کہ ان کے نکاح میں رسول اللہ صلی اللہ علیہ وسلم کی لخت جگر تھیں، وہ ان دنوں بیمار ہوئیں تو رسول اللہ صلی اللہ علیہ وسلم نے حضرت عثمان رضی اللہ عنہ سے فرمایا: ”(تم اس کی تیمارداری کرو) تمہیں جنگ بدر میں شریک ہونے والوں کے برابر حصہ اور ثواب ملے گا۔“ باقی رہا ان کا بیعت رضوان سے غائب رہنا! تو اگر کوئی شخص مکہ میں حضرت عثمان رضی اللہ عنہ سے زیادہ باعزت ہوتا تو آپ صلی اللہ علیہ وسلم اسے روانہ کر دیتے، لہٰذا انہیں رسول اللہ صلی اللہ علیہ وسلم نے بھیجا تھا تو وہ چلے گئے اور جب بیعت رضوان ہوئی تو رسول اللہ صلی اللہ علیہ وسلم نے اپنے دائیں ہاتھ کو حضرت عثمان رضی اللہ عنہ کا ہاتھ قرار دے کر اسے اپنے بائیں ہاتھ کے اوپر رکھا اور فرمایا: ”یہ حضرت عثمان رضی اللہ عنہ کی بیعت ہے۔“ پھر حضرت ابن عمر رضی اللہ عنہ نے اس شخص سے فرمایا: ”اب ان باتوں کو بھی اپنے ساتھ لے جا۔““ [صحيح البخاري/كِتَاب فَضَائِلِ الصحابة/حدیث: 3698]

حضرت عبداللہ بن عمر رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم کے عہد مبارک میں ہم حضرت ابوبکر رضی اللہ عنہ کے برابر کسی کو خیال نہیں کرتے تھے، پھر حضرت عمر رضی اللہ عنہ کو، اس کے بعد حضرت عثمان رضی اللہ عنہ کو۔ پھر ہم نبی صلی اللہ علیہ وسلم کے اصحاب کو چھوڑ دیتے تھے، ایک دوسرے سے کسی کو افضل نہیں جانتے تھے۔“ عبدالعزیز سے روایت کرنے میں عبداللہ نے شاذان کی متابعت کی ہے۔ [صحيح البخاري/كِتَاب فَضَائِلِ الصحابة/حدیث: 3699]