حضرت جریر بن عبداللہ رضی اللہ عنہ سے روایت ہے، انہوں نے فرمایا: ”جب سے میں اسلام لایا ہوں مجھے رسول اللہ صلی اللہ علیہ وسلم نے کبھی نہیں روکا اور جب بھی آپ صلی اللہ علیہ وسلم مجھے دیکھتے تو مسکرا دیتے تھے۔“ [صحيح البخاري/كِتَاب مَنَاقِبِ الْأَنْصَارِ/حدیث: 3822]

حضرت جریر بن عبداللہ رضی اللہ عنہ سے روایت ہے، انہوں نے فرمایا کہ زمانہ جاہلیت میں «ذُو الْخَلَصَةِ» ”ذوالخلصہ“ نامی ایک بت کدہ تھا، جسے «الْكَعْبَةُ الْيَمَانِيَّةُ» ”الکعبہ الیمانیہ“ یا «الْكَعْبَةُ الشَّامِيَّةُ» ”الکعبہ الشامیہ“ بھی کہتے تھے۔ رسول اللہ صلی اللہ علیہ وسلم نے مجھ سے فرمایا: ”کیا تم ذوالخلصہ کی طرف سے مجھے آرام پہنچا سکتے ہو؟“ حضرت جریر رضی اللہ عنہ نے کہا کہ میں قبیلہ احمس سے ایک سو پچاس سواروں کو لے کر وہاں گیا اور ہم نے اسے زمین بوس کر دیا، نیز جسے وہاں پایا اسے قتل کر دیا۔ پھر ہم نے آپ صلی اللہ علیہ وسلم کی خدمت میں حاضر ہو کر حالات بیان کیے تو آپ صلی اللہ علیہ وسلم نے ہمارے لیے اور قبیلہ احمس کے لیے دعا فرمائی۔ [صحيح البخاري/كِتَاب مَنَاقِبِ الْأَنْصَارِ/حدیث: 3823]