عبید بن عمر سے روایت ہے، انہوں نے کہا: حضرت عمر رضی اللہ عنہ نے ایک مرتبہ نبی صلی اللہ علیہ وسلم کے صحابہ کرام رضی اللہ عنہم سے دریافت فرمایا کہ تمہارے خیال کے مطابق درج ذیل آیت ﴿أَيَوَدُّ أَحَدُكُمْ أَنْ تَكُونَ لَهُ جَنَّةٌ﴾ [سورة البقرة: 266] ”کیا تم میں سے کوئی پسند کرتا ہے کہ اس کا ایک باغ ہو...“ کس معاملے کے متعلق نازل ہوئی تھی؟ صحابہ کرام رضی اللہ عنہم نے کہا: ”اللہ ہی بہتر جانتا ہے۔“ حضرت عمر رضی اللہ عنہ نے غصے میں آ کر کہا: ”یہ کیا بات ہوئی؟ صاف کہو کہ ہمیں معلوم ہے یا معلوم نہیں۔“ اس وقت حضرت ابن عباس رضی اللہ عنہما کہنے لگے: ”اے امیر المومنین! میرے دل میں ایک بات آئی ہے۔“ آپ نے فرمایا: ”اے میرے بھتیجے! بیان کرو اور خود کو حقیر نہ خیال کرو۔“ حضرت ابن عباس رضی اللہ عنہما نے کہا: ”اس آیت میں عمل کی مثال بیان کی گئی ہے۔“ حضرت عمر رضی اللہ عنہ نے فرمایا: ”کون سے عمل کی مثال بیان کی گئی ہے؟“ حضرت ابن عباس رضی اللہ عنہما نے کہا: ”بس عمل کی مثال ہے۔“ حضرت عمر رضی اللہ عنہ نے فرمایا: ”یہ ایک مال دار شخص کی مثال ہے جو اللہ کی اطاعت میں عمل کرتا رہتا ہے، پھر اللہ تعالیٰ اس پر شیطان کو غالب کر دیتا ہے تو وہ گناہوں میں مصروف ہو جاتا ہے اور اس کے نیک اعمال سب کے سب فنا ہو جاتے ہیں۔“ «فَصُرْهُنَّ» کے معنی ہیں: ”ان کو ٹکڑے ٹکڑے کر دے۔“ [صحيح البخاري/كِتَاب تَفْسِيرِ الْقُرْآنِ/حدیث: 4538]