حضرت ابن عباس رضی اللہ عنہ سے روایت ہے، انہوں نے درج ذیل آیت کی تفسیر کرتے ہوئے فرمایا: ”ایسی عورتوں کو اشارے کے ساتھ پیغامِ نکاح دو۔ یعنی میں شادی کا ارادہ رکھتا ہوں، میری آرزو ہے کہ مجھے نیک بیوی میسر ہو جائے۔“ امام قاسم رحمہ اللہ نے اس آیت کی تفسیر کرتے ہوئے فرمایا: ”(کہ وہ کہے) بلاشبہ تو میرے ہاں قابلِ احترام اور معزز ہے، بے شک میں تیرے متعلق نیک جذبات رکھتا ہوں، یقیناً اللہ تیری طرف خیر و برکت بھیجنے والا ہے، یا اس طرح کے اور الفاظ کہے۔“ امام عطاء رحمہ اللہ نے اس کی تفسیر کرتے ہوئے فرمایا: ”(نکاح کے لیے صرف) اشارہ کرے واضح طور پر نہ کہے، مثلاً یوں کہے: مجھے نکاح کی ضرورت ہے، تو بڑی خوش قسمت ہے، «الْحَمْدُ لِلّٰهِ» ”اللہ کے لیے تمام تعریفیں ہیں“ تم اچھی عورت ہو۔“ اور عورت اس کے جواب میں کہے: ”جو کچھ آپ کہہ رہے ہیں میں اسے سن رہی ہوں“ لیکن (صراحت کے ساتھ) کسی بات کا وعدہ نہ کرے۔ عورت کا سر پرست بھی اس کے علم کے بغیر کوئی وعدہ نہ کرے، اگر کسی عورت نے دورانِ عدت میں کسی آدمی سے نکاح کا وعدہ کر لیا، بعد میں اس کے ساتھ نکاح رچا لیا تو ان دونوں میں جدائی نہیں کرائی جائے گی، امام حسن بصری رحمہ اللہ نے کہا: ”تم ان سے خفیہ معاہدہ نہ کرو۔“ اس سے مراد چھپ کر بدکاری کرنا ہے۔ حضرت ابن عباس رضی اللہ عنہ سے منقول ہے، آپ نے ﴿حَتَّىٰ يَبْلُغَ الْكِتَابُ أَجَلَهُ﴾ [سورة البقرة: 235] کے متعلق فرمایا کہ ”اس سے مراد عورت کا اپنی عدت پوری کرلینا ہے۔“ [صحيح البخاري/كِتَاب النِّكَاحِ/حدیث: 5124]