حضرت ام خالد بنت خالد رضی اللہ عنہا سے روایت ہے کہ نبی صلی اللہ علیہ وسلم کے پاس کچھ کپڑے لائے گئے، ان میں ایک چھوٹی سی دھاری دار اونی چادر بھی تھی۔ آپ صلی اللہ علیہ وسلم نے فرمایا: ”تمہارا کیا خیال ہے کہ ہم یہ چادر کس کو پہنائیں؟“ صحابہ کرام رضی اللہ عنہم خاموش رہے۔ رسول اللہ صلی اللہ علیہ وسلم نے فرمایا: ”ام خالد رضی اللہ عنہا کو میرے پاس لاؤ۔“ چنانچہ انہیں اٹھا کر لایا گیا تو رسول اللہ صلی اللہ علیہ وسلم نے وہ چادر اپنے ہاتھ میں لی اور انہیں پہنا کر یہ دعا دی: «أَبْلِي وَأَخْلِقِي» ”اللہ کرے تم اسے خوب پہنو اور پرانا کرو۔“ اس چادر میں سبز یا زرد نقش ونگار تھے، آپ صلی اللہ علیہ وسلم نے فرمایا: ”اے ام خالد! یہ نقش ونگار «سَنَهْ» ہیں۔“ حبشی زبان میں لفظ «سَنَهْ» خوبصورت کے معنیٰ میں استعمال ہوتا ہے۔ [صحيح البخاري/كِتَاب اللِّبَاسِ/حدیث: 5823]

حضرت انس رضی اللہ عنہ سے روایت ہے انہوں نے کہا: ”جب ام سلیم رضی اللہ عنہا نے بچہ جنم دیا تو انہوں نے مجھے کہا: ”اے انس! اس بچے کا خیال رکھو، یہ کوئی چیز نہ کھانے پائے حتیٰ کہ صبح کے وقت تم اسے نبی صلی اللہ علیہ وسلم کے پاس لے جاؤ، تاکہ آپ اسے گھٹی دیں۔“ چنانچہ میں اسے لے کر گیا تو آپ صلی اللہ علیہ وسلم اس وقت ایک باغ میں تھے اور آپ ایک سیاہ اونی چادر اوڑھے ہوئے تھے۔ اس وقت آپ ان اونٹوں کو داغ لگا رہے تھے جو فتح مکہ میں آپ کے پاس آئے تھے۔“ [صحيح البخاري/كِتَاب اللِّبَاسِ/حدیث: 5824]