حضرت عمران رضی اللہ عنہ سے روایت ہے، وہ کہتے ہیں کہ میں نے پوچھا: ”اے اللہ کے رسول! پھر لوگ عمل کس لیے کرتے ہیں؟“ آپ صلی اللہ علیہ وسلم نے فرمایا: ”ہر شخص کے لیے اس عمل میں آسانی پیدا کر دی گئی ہے جس کے لیے اسے پیدا کیا گیا ہے۔“ [صحيح البخاري/كِتَاب التَّوْحِيدِ/حدیث: 7551]

حضرت علی رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم ایک جنازے میں شریک تھے کہ آپ صلی اللہ علیہ وسلم نے وہاں ایک لکڑی پکڑ لی اور اس سے زمین کریدنے لگے، پھر آپ صلی اللہ علیہ وسلم نے فرمایا: ”تم میں سے ہر ایک کی جگہ دوزخ یا جنت میں لکھ دی گئی ہے۔“ صحابہ رضی اللہ عنہم نے کہا: ”کیا ہم اسی پر بھروسا نہ کر لیں؟“ آپ صلی اللہ علیہ وسلم نے فرمایا: ”تم عمل کرتے رہو، ہر عمل آسان کر دیا گیا ہے (جس کے لیے انسان پیدا کیا گیا ہے)“ پھر آپ صلی اللہ علیہ وسلم نے یہ آیت پڑھی: ﴿فَأَمَّا مَنْ أَعْطَىٰ وَاتَّقَىٰ﴾ [سورة الليل: 5] ”جس شخص نے اللہ کی راہ میں دیا اور تقویٰ اختیار کیا۔“ [صحيح البخاري/كِتَاب التَّوْحِيدِ/حدیث: 7552]