حضرت ابو محذورہ اور حضرت بلال کی اذان کے آخری کلمات ”الصلاۃ خیر من النوم“ ہوا کرتے تھے۔ [مصنف ابن ابي شيبه/كتاب الأذان والإقامة/حدیث: 2176]

حضرت سوید بن غفلہ نے اپنے موذن کو یہ پیغام بھیجا کہ جب تم حی علی الفلاح پر پہنچو تو الصلاۃ خیر من النوم کہا کرو کیونکہ یہ حضرت بلال کی اذان تھی۔ [مصنف ابن ابي شيبه/كتاب الأذان والإقامة/حدیث: 2177]

حضرت اسماعیل فرماتے ہیں کہ ایک مرتبہ حضرت عمر کا موذن انہیں صبح کی اذان کی اطلاع دینے آیا اور اس نے کہا: الصَّلاَۃُ خَیْرٌ مِنَ النَّوْمِ۔ حضرت عمر کو یہ کلمات بہت پسند آئے اور آپ نے موذن سے فرمایا کہ ان کلمات کو اپنی اذان کا حصہ بنا لو۔ [مصنف ابن ابي شيبه/كتاب الأذان والإقامة/حدیث: 2178]

حضرت نافع فرماتے ہیں کہ حضرت ابن عمر رضی اللہ عنہما اپنی اذان میں یہ کلمات کہا کرتے تھے: الصلاۃ خیر من النوم [مصنف ابن ابي شيبه/كتاب الأذان والإقامة/حدیث: 2179]

حضرت محمد فرماتے ہیں کہ اذان میں الصَّلاَۃُ خَیْرٌ مِنَ النَّوْمِ کہنا سنت نہیں ہے۔ [مصنف ابن ابي شيبه/كتاب الأذان والإقامة/حدیث: 2180]

حضرت سعید بن مسیب کہتے ہیں کہ حضرت بلال نماز کے وقت کی اطلاع دینے کے لئے حضور صلی اللہ علیہ وآلہ وسلم کی خدمت میں حاضر ہوئے۔ آپ کو بتایا گیا کہ حضور صلی اللہ علیہ وآلہ وسلم سو رہے ہیں۔ حضرت بلال نے اونچی آواز سے کہا: الصَّلاَۃُ خَیْرٌ مِنَ النَّوْمِ۔ اس کے بعد سے یہ الفاظ اذان کا حصہ بن گئے۔ [مصنف ابن ابي شيبه/كتاب الأذان والإقامة/حدیث: 2181]

حضرت ہشام بن عروہ روایت کرتے ہیں کہ ان کے والد اپنی اذان میں یہ کلمات کہا کرتے تھے: الصَّلاَۃُ خَیْرٌ مِنَ النَّوْمِ، الصَّلاَۃُ خَیْرٌ مِنَ النَّوْمِ، اللَّہُ أَکْبَرُ، اللَّہُ أَکْبَرُ، لاَ إِلَہَ إِلاَّ اللَّہُ۔ [مصنف ابن ابي شيبه/كتاب الأذان والإقامة/حدیث: 2182]

حضرت قاسم بن مخیمرہ اپنی اذان کی تثویب میں یہ کلمات کہا کرتے تھے: الصَّلاَۃُ خَیْرٌ مِنَ النَّوْمِ، الصَّلاَۃُ خَیْرٌ مِنَ النَّوْمِ۔ [مصنف ابن ابي شيبه/كتاب الأذان والإقامة/حدیث: 2183]

حضرت ہشام فرماتے ہیں کہ حضرت حسن اور حضرت محمد کے نزدیک تثویب کا معنٰی یہ تھا کہ یہ کلمات کہے جائیں۔ حَیَّ عَلَی الصَّلاَۃِ، الصَّلاَۃُ خَیْرٌ مِنَ النَّوْمِ۔ [مصنف ابن ابي شيبه/كتاب الأذان والإقامة/حدیث: 2184]

حضرت عمران بن ابی الجعد فرماتے ہیں کہ حضرت اسود بن یزید نے موذن کو فجر کی اذان میں یہ کلمات کہتے سنا: الصَّلاَۃُ خَیْرٌ مِنَ النَّوْمِ۔ تو فرمایا کہ اذان میں ان کلمات کا اضافہ نہ کرو جو اس کا حصہ نہیں ہیں۔ [مصنف ابن ابي شيبه/كتاب الأذان والإقامة/حدیث: 2185]